Túrkııa Syrtqy ister mınıstri Qazaqstanǵa resmı sapar jasaıdy
ASTANA. Aqpannyń 8-i. QazAqparat /Erur Aqanbaı/ - Aqpannyń 10-y men 12-si aralyǵynda Túrkııa Respýblıkasynyń Syrtqy ister mınıstri Ahmet Dáýitoǵly Qazaqstanǵa resmı sapar jasaıdy. Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov aıtty,
dep habarlaıdy QazAqparat.
Onyń aıtýynsha, A. Dáýitoǵly bizdiń elimizge QR Memlekettik hatshysy-Syrtqy ister mınıstri Qanat Saýdabaevtyń shaqyrýymen kelgeli otyr. «Sapar baǵdarlamasy aıasynda Túrkııanyń syrtqy saıasat vedomstvosy basshysynyń bizdiń elimizdiń basshylyǵymen kezdesýleri josparlanyp otyr. Onyń barysynda Astana men Ankara arasyndaǵy eki jaqty jáne kóp jaqty formattardaǵy saıası, ekonomıkalyq jáne mádenı-gýmanıtarlyq yntymaqtastyq, sonyń ishinde BUU, EQYU, IKU jáne Túrki tildes memleketterdiń yntymaqtastyq keńesi aıasyndaǵy yntymaqtastyq máseleleri talqylanatyn bolady», dedi A. Ábdirahmanov.
Onyń sózine qaraǵanda, sondaı aq sapar aıasynda aǵymdaǵy jylǵy maýsymnyń 7-si men 9-y aralyǵynda Ystambulda ótetin Azııadaǵy ózara is-qımyl jáne senim sharalary keńesine (AÓІSShK) múshe elderdiń memleket jáne úkimet basshylarynyń úshinshi sammıtine daıyndyq barysy talqylanady. Bıyl atalmysh qurylymnyń tóraǵalyǵy Qazaqstannan Túrkııaǵa tapsyrylǵan.
«Túrkııa Syrtqy ister mınıstriniń sapary 2009 jylǵy qazannyń 22-de Elbasy Nursultan Nazarbaevtyń Ankaraǵa jasaǵan resmı sapary barysynda qol qoıǵan Qazaqstan Respýblıkasy men Túrkııa Respýblıkasy arasyndaǵy Strategııalyq seriktestik týraly shartta belgilengen qaǵıdalardy iske asyrýǵa baǵyttalǵan», dedi resmı ókil.
