Túrkııa smartfondy nesıege alǵansha, bankten jalǵa alýdy usyndy
ASTANA. KAZINFORM- Túrkııada smartfondardy paıdalanýdyń jańa úlgisi talqylanyp jatyr. Klıentter qurylǵylardy bankter arqyly 12 nemese 24 aıǵa jalǵa alyp, merzim aıaqtalǵannan keıin qaıtarýyna bolady, dep habarlaıdy AZERTADJ.
Túrkııalyq buqaralyq aqparat quraldarynyń habarlaýynsha, bul júıe tanymal joǵary sanatty smartfondarǵa, sonyń ishinde iPhone-ǵa da qoldanylýy múmkin.
Mysal retinde 256 GB jady bar, quny 150 myń lıra (shamamen 1 392 000 teńge) turatyn iPhone Pro Max modeli keltiriledi. Eki jylǵa jalǵa alǵan jaǵdaıda aı saıynǵy tólem 7 150 lırany (shamamen 66 500 teńge) quraıdy. Al 24 aıdaǵy jalpy tólem 171 600 lıraǵa (shamamen 1 595 000 teńge) jetedi. Kelisimshart merzimi aıaqtalǵannan keıin qurylǵyny bankke qaıtarý qajet bolady.
Sondaı-aq jaldaý aqysyn birjolǵy tóleý múmkindigi qarastyrylǵan. Bul jaǵdaıda smartfondy eki jyldan keıin qaıtarý shartymen 124 myń lıra (shamamen 1 152 000 teńge) tólenedi.
Kelisimshart talaptaryna sáıkes, klıent jalǵa alý merzimi ishinde qurylǵyny tórt retten artyq jóndete almaıdy.
Túrkııada qoldanystaǵy zańnamaǵa sáıkes, quny 20 myń lıradan asatyn uıaly telefondardy satyp alýǵa beriletin nesıe merzimi úsh aımen shekteledi. Osylaısha, quny 150 myń lıra bolatyn smartfondy nesıege satyp alǵan jaǵdaıda aı saıyn shamamen 50 myń lıra tóleý qajet edi.
Jańa model qymbat smartfon paıdalanatyn adamdardyń aı saıynǵy tólemin azaıtýǵa múmkindik beredi dep boljanyp otyr. Alaıda kelisimshart merzimi aıaqtalǵannan keıin qurylǵy banktiń menshiginde qalady.
Buǵan deıin Qazaqstanda 20 tamyzdan bastap uıaly telefondardy satýdyń jańa erejeleri kúshine engeni týraly jazǵan edik.
