Túrkııa Syrtqy ister mınıstri G20 otyrysynda Gazadaǵy atysty toqtatýǵa shaqyrdy

ASTANA. KAZINFORM - Túrkııa Syrtqy ister mınıstri Hakan Fıdan halyqaralyq qaýymdastyqty Gaza sektoryndaǵy atysty toqtatýǵa jáne Izraıl-Palestına qaqtyǵysyn «eki halyqqa eki memleket» tujyrymdamasy negizinde sheshýge kóbirek kúsh salýǵa shaqyrdy, dep jazady Anadoly agenttigi.

Túrkııa dıplomatııalyq qyzmetiniń basshysy Brazılııanyń Rıo-de-Janeıro qalasynda ótken G20 elderiniń syrtqy ister mınıstrleri deńgeıindegi otyrysyna qatysýshylar aldynda sóılegen sózinde: «Gaza sektoryndaǵy qatygezdik múmkindiginshe tezirek toqtatylýy kerek», - dedi.

Dıplomatııalyq derekkózderdiń habarlaýynsha, Fıdan sessııada «Úzdiksiz halyqaralyq shıelenisti retteýdegi G20 róli» taqyrybynda sóılegen.

Hakan Fıdan barlyq taraptardy jahandyq beıbitshilik pen qaýipsizdik úshin jumys isteýge shaqyrdy. Mınıstr bul taqyryp 1-3 naýryzda ótetin Antalııa dıplomatııalyq forýmynda (ADF) «Daǵdarystardyń aldyn alýda dıplomatııany paıdalaný» taqyrybynda kóteriletinin eske saldy.

Esterińizge sala keteıik, jaqynda Ýels hanzadasy Ýılıam Gaza sektoryndaǵy qaqtyǵysty tez arada toqtatýǵa shaqyrdy. Onyń bul málimdemesi Ulybrıtanııada daý týdyrdy, óıtkeni keıbireýler taq murageri jahandyq kún tártibindegi kúrdeli saıası máselege tikeleı aralasty dep sanaıdy.