Túrkııa sırııalyq bosqyndar máselesin sheshe almaı otyr
ASTANA. 2 qyrkúıek. QazAqparat - Túrkııa basshylyǵy sırııalyq bosqyndar máselesin retteý úshin BUU-nyń kómegine júgindi.
Túrkııa syrtqy ister mınıstri Ahmet Davýtoǵlýnyń málimdeýinshe, el kún sanap ósip jatqan sırııalyq bosqyndardyń aǵymyna qarsy ózdigimen áreket ete almaýda. Bul týraly «Habar» agenttigi jazady.
Aıta keter jaıt, Davýtoǵlý buǵan deıin de Sırııanyń Túrkııamen shekaralas soltústik bóliginde bosqyndardy ornalastyratyn býferlik aımaq qurýdy usynyp, BUU-nan qoldaý kórsetýdi suraǵan edi. Jýyrda ǵana BUU-nyń bosqyndar jónindegi agenttigi baıandama ázirlep, onda sırııalyq bosqyndardyń basym bóliginiń Túrkııaǵa aǵylyp jatqanyn atap kórsetken bolatyn. Qazirdiń ózinde olardyń sany 74 myńǵa jetken. 61 myńǵa jýyq sırııalyq Iordanııada. Iran, Irak jáne Lıvanǵa ketken sırııalyqtar da az emes. Óz elinen qashyp ketýge májbúr bolǵan tirkelgen sırııalyqtardyń jalpy sany 25 tamyzdaǵy kórsetkish boıynsha 202 myń 512 adamǵa jetken. Al, munyń aldyndaǵy boljamdarda osy jyldyń sońyna deıin bosqyndar sany 185 myń adamǵa jetedi delingen edi.
