Túrkııa sırııalyq bosqyndardyń úıine oralýyna kómektesedi — SІM

Túrik tarapy Túrkııada turatyn sırııalyq bosqyndardyń otanyna aman-esen oralýy úshin bar kúsh-jigerin salady. Bul týraly dúısenbide eldiń Syrtqy ister mınıstri Hakan Fıdan málimdedi, dep jazady Sınhýa agenttigi.

— Biz olardyń qaýipsiz jáne laıyqty oralýyn qamtamasyz etý úshin qoldan kelgenniń bárin jasaımyz, — dep ýáde berdi H.Fıdan Túrkııa astanasy Ankarada ótken 15-shi Elshiler konferentsııasynda sóılegen sózinde.

Ol Sırııanyń aýmaqtyq tutastyǵy men turaqtylyǵyn qamtamasyz etý úshin barlyq múddeli taraptarmen qoldaý kórsetýge jáne kúsh-jigerdi úılestirýge Túrkııa daıyn ekenin aıtty.

Sondaı-aq dúısenbi kúni Stambýldaǵy Hurriyet Daily News gazeti otanyna qaıtqysy keletin sırııalyq bosqyndar ońtústik-shyǵys Hataı provıntsııasynyń Reıhanly aýdanyndaǵy Túrkııa-Sırııa shekarasyndaǵy baqylaý-ótkizý beketinde kedennen ótý úshin uzyn-sonar kezekke turǵanyn habarlady.

— Shekara ótkelinde adamdar shekten tys kóp jınalmaýy úshin jandarmerııa shekaradan 5 shaqyrymdaı jerde qosymsha baqylaý beketin ornatty, - delingen habarlamada.

Dúnıejúzilik densaýlyq saqtaý uıymynyń málimeti boıynsha Túrkııaǵa 3,5 mıllıonnan astam sırııalyq kelgen.

Eske sala keteıik, Túrkııa Sırııadaǵy saıasatynyń 3 negizgi basymdyǵyn belgilegenin jazǵan bolatynbyz.

Sırııanyń keıbir qalalarynda komendanttyq saǵat engizildi.