Túrkııa Sırııada besinshi áskerı operatsııa bastamaq

ANKARA. QazAqparat – Túrik qarýly kúshteri Sırııa Arab Respýblıkasynyń (SAR) aýmaǵynda jańa transshekaralyq operatsııany josparlap otyr, dep habarlaıdy QazAqparat menshikti tilshisi YeniŞafak-qa silteme jasap.

Buǵan deıin Túrkııa áskeri eldiń ońtústik-shyǵys shekaralarynda qaýipsiz aımaqtar qurý úshin osyndaı lańkestikke qarsy operatsııalardy júrgizgen bolatyn. «Evfrat qalqany», «Záıtún butaǵy» jáne «Kóktemgi qalqan» áskerı operatsııalary sátti operatsııalar bolyp sanalady. Olardyń keıbireýleri birneshe ret ótkizildi. Qazirgi besinshi antıterrorıstik operatsııa «Barysh pynary» dep atalady. Bul túrik tilinen aýdarǵanda «Beıbitshilik kózi» degen maǵynany bildiredi. Lańkestikke qarsy besinshi operatsııa Sırııanyń soltústik bóliginde ótkizilmek.

Mınıstrler kabınetiniń otyrysynan keıin ultqa jasaǵan úndeýinde R. Erdoǵan mundaı jaǵdaılarda Túrkııa Qarýly kúshteriniń negizgi maqsattary eldiń ońtústik óńirleriniń ǵana emes, búkil respýblıkanyń qaýipsizdigin qamtamasyz etýden basqa eshteńe emes ekenin aıtty.
«Biz ońtústik shekaralarymyzdyń boıynda 30 shaqyrymdyq qaýipsizdik aımaǵyn qurý boıynsha jumys istep jatyrmyz. «Beıbitshilik kózi» operatsııasy Túrkııaǵa qatysty terrorıstik qaýipti beıtaraptandyrady jáne sırııalyq bosqyndardyń týǵan jerlerine jaıly oralýyn jeńildetetin qaýipsiz aımaq qurýǵa múmkindik beredi. Biz Sırııanyń aýmaqtyq tutastyǵyn saqtap, aımaq halqyn lańkesterden azat etemiz», - dedi Túrkııa prezıdenti.
Avtor: Aqjigit Chýkýbaev