Túrkııa Sırııa azamattaryn qorǵaý baǵytyndaǵy sharalardy jalǵastyra beredi
«Biz janjaldasýshy taraptar arasynda áýe keńistigi arqyly qoldanylatyn qurylǵylardy qosa alǵanda barlyq qarýlardy qoldanýdy toqtatý men óńirge gýmanıtarlyq kómekterdiń úzilissiz jetkizilýin qamtamasyz etýge qatysty máseleler kóterilgen atalmysh memorandýdy qoldaımyz. Túrkııa qaýipsizdik pen gýmanıtarlyq qajettilikter turǵysynan alǵanda sırııalyq azamattardy tıimdi qorǵaýǵa baǵyttalǵan sharalardy júzege asyrýǵa kúsh sala beretin bolady. Bir mezgilde Túrkııa saıası retteý protsesinde aqylǵa qonymdy qadamdar jasaı otyryp, qazirgi tańdaǵy atysty toqtatý týraly rejımdi qoldaıdy»,-delingen Túrkııanyń SІM málimdemesinde.
Aıta keteıik, 3-4 mamyr kúnderi Sırııadaǵy shıelenisti retteý boıynsha Astana protsesiniń tórtinshi raýndy ótti. Onda 2016 jyldyń 30 jeltoqsanynda jarııalanǵan atysty toqtatý týraly rejımdi qoldaýǵa arnalǵan saıası sheshimdi izdestirý joldary qarastyrylyp, osyǵan qaraı janjaldasýshy taraptar paıdalanýy yqtımal senim sharalary daıyndaldy.
Kezdesý barysynda atysty toqtatý baǵytynda kepilger memleketter bolyp tabylatyn - Túrkııa, Reseı men Iran tarapynan Sırııada, naqtyraq aıtqanda, Latakııa provıntsııasynyń jekelegen aımaqtarynda, Alepponyń birqatar óńirlerinde, Hama provıntsııasynda, Homs, Damask/Shyǵys Gýta provıntsııalarynyń jekelegen bólikterinde jáne Deraa men Kýneıtranyń birqatar aýmaqtaryn qamtıtyn óńirlerde qaýipsizdik aımaǵyn qalyptastyrý týraly memorandýmǵa qol qoıyldy.
