Túrkııa SІM Haıat Býmeddenniń Sırııaǵa Túrkııa arqyly ketkenin rastady
ASTANA. QazAqparat - Parıjdegi lańkestik oqıǵalarǵa qatysýshylardyń biri Amedı Kýlıbalıdiń jaqtasy Haıat Býmeddenniń Túrkııa shekarasy arqyly Sırııaǵa ótip ketkenin el bıligi rastady, dep habarlady VVS.
Bul máselede Túrkııa Frantsııanyń Býmeddendi el shekarasynan ótkizbeý týraly resmı túrde suraý jibermegenin alǵa tartty. Aqparat kóziniń habarlaýynsha, Frantsııa bıligi 26 jastaǵy Haıat Býmeddenniń qarýlanǵanyn jáne qaýipti ekenin eskertken. Túrik bıliginiń málimdeýinshe, ol elge Ispanııadan Parıjdegi oqıǵaǵa deıin 2 qańtarda kelgen. Sırııaǵa Túrkııadan 8 qańtar kúni ketip qalǵan. Eske sala ketelik, 7 qańtar kúni Parıjde Charlie Hebdo satıralyq jýrnalyna lańkestik áreket jasalyp, 12 adam mert boldy. 8 qańtar kúni Býmeddenniń jaqtasy Amedı Kýlıbalı áıel polıtseıdi óltirdi. Kelesi kúni birneshe saǵat boıy dúkende adamdardy kepilge ustady. Lańkestik shabýyldardan barlyǵy 17 adam qaza tapty.
