Túrkııa ShYU-na kirý máselesin talqylaýda
ASTANA. QazAqparat - Túrkııa Eýroodaqqa kirýmen shektelip qalmaıdy. Ankara sonymen qatar Shanhaı yntymaqtastyq uıymynyń quramyna kirýge de umtylyp otyr, dep málimdedi Túrkııa prezıdenti Rejep Taııp Erdoǵan. Onyń sózin Sabah basylymy keltirdi.
«Brexit tarap ketýi múmkin degen sózder Frantsııa, Italııa tarapynan da estilip qalady. Mundaı jaǵdaıda Túrkııa ózin erkin sezinýi kerek. Nege biz ShYU-nyń múshesi bola almaımyz»,-dedi Erdoǵan Ózbekstannan qaıtyp kele jatyp, ushaqta jýrnalısterge bergen suhbatynda.
Túrkııa kóp jyldardan beri Eýropalyq Odaqqa múshe bolý baǵytynda kelissózder júrgizýde. 2016 jyldyń kókteminde Eýroodaq basshylary Túrkııa Eýropaǵa mıgranttardyń aǵylýyna toqtaý salatyn bolsa, túrikterdiń odaqqa múshe bolýy baǵytyndaǵy kelissózderdi qaıta jandandyratynyna kelisim bergen.
Alaıda, qarasha aıynyń basynda Eýrokomıssııa ókilderi ózderiniń baıandamalarynda Túrkııada adam quqyqtary men sóz bostandyǵy jáne zań ústemdigin qamtamasyz etýge qatysty úlken problemalardyń bar ekendigin aıtqan.
Buǵan jaýap retinde Ankara tarapy Eýroodaqpen dıalogty jalǵastyrý máselesin referendýmǵa qoıýlary múmkin ekendigin málimdedi.
