Túrkııa shilde aıynda taýar eksporttaý boıynsha tarıhı rekord ornatty

ASTANA. KAZINFORM — 2025 jyldyń shilde aıynda Túrkııanyń eksporty ótken jyldyń dál osy kezeńimen salystyrǵanda 11%-ǵa ósip, 24,9 mıllıard AQSh dollaryna jetti, dep habarlaıdy Anadoly.

Al ımport kólemi 5,4%-ǵa artyp, 31,3 mıllıard dollar boldy. Bul týraly senbi kúni Túrkııa Saýda mınıstrligi habarlady.

Syrtqy saýda aınalymy 56,33 mıllıard dollar bolyp, ótken jyldyń shildesimen salystyrǵanda 7,8%-ǵa artty.

Syrtqy saýda tapshylyǵy shilde aıynda 12,1%-ǵa qysqaryp, 6,4 mıllıard dollar boldy. Importtyń eksportpen jabylý koeffıtsıenti 4,1 paıyzdyq tarmaqqa artyp, 79,5%-ǵa jetti. Energııa tasymaldaýshylary men altyndy esepke almaǵanda bul kórsetkish 91,5%.

Eksport qurylymynda kóshbasshy oryndy aralyq ónimder (shıkizat) ıelendi — 12,8 mıllıard dollar, bul ótken jylmen salystyrǵanda 9,3%-ǵa kóp. Odan keıin tutynýshylyq taýarlar — 7,94 mıllıard dollar jáne ınvestıtsııalyq kapıtal taýarlary — 3,7 mıllıard dollar.

Germanııa Túrik taýarlary úshin eń iri eksporttyq naryq boldy — 1,9 mıllıard dollar. Eń iri ımporttaýshy elderdiń ondyǵyna sondaı-aq Ulybrıtanııa, AQSh jáne Eýropa Odaǵy elderi kirdi. Olardyń eksporttaǵy úlesi 48,5%.

Import qurylymynda negizgi úlesti shıkizat taýarlary aldy — 20,4 mıllıard dollar, ınvestıtsııalyq kapıtal taýarlary — 5,38 mıllıard dollar jáne tutynýshylyq taýarlar — 5,35 mıllıard dollar. Túrkııaǵa taýar jetkizýshi elder arasynda Qytaı, Reseı jáne Germanııa aldyńǵy qatarda.

2025 jylǵy qańtar-shilde aralyǵynda Túrkııa eksporty 5,2%-ǵa artyp, 156,4 mıllıard dollardy qurady. Al ımport kólemi 6,9%-ǵa ósip, 212,2 mıllıard dollar boldy. Syrtqy saýda tapshylyǵy osy kezeńde 12,2%-ǵa artyp, shamamen 56 mıllıard dollarǵa jetti.

Túrkııanyń saýda mınıstri Ómer Bolattyń aıtýynsha, shilde aıynda taýar eksporty kólemi el tarıhyndaǵy eń joǵary aılyq kórsetkishke jetti.

— Shildede eksport kólemi 25 mıllıard dollarǵa jetip, rekord jańartyldy. Bul ótken jyldyń shildesimen salystyrǵanda 11%-ǵa artyq, — dedi mınıstr.

Sonymen birge bul kórsetkish shilde aılary arasyndaǵy da jańa rekord bolyp esepteledi.

Aıta ketelik Túrkııada alǵash ret ushaq toqtamaı oryndarynan turǵan jolaýshylarǵa aıyppul salyndy.