Túrkııa ShYU tolyq múshesi bolýdy josparlap otyr
VAShINGTON. KAZINFORM — Túrkııa Prezıdenti Rejep Taııp Erdoǵan NATO múshe memleketteri basshylarynyń sammıtinen keıingi baspasóz máslıhatynda osyndaı málimdeme jasady. Bul jaıynda Prezıdent sózinen tikeleı translıatsııa jasaǵan TRT Haber habarlady.
Sóz basynda Memleket basshysy terrorızmge qarsy kúreste odaqtastar arasyndaǵy yntymaqtastyqty nyǵaıtý qajettigin atap ótti.
Onyń aıtýynsha, Túrkııa NATO-ǵa qaýip tóndiretin eki negizgi qaýiptiń biri — terrorızmmen kúreste odaqtastarynan nıettestik kútedi.
«Bul odaq týraly zańda da talap etilgen», — dedi ol.
Erdoǵan Izraıldiń Palestına halqyna qarsy úzdiksiz agressııasyna nazar aýdardy. Onyń aıtýynsha, Palestınada jan-jaqty jáne turaqty beıbitshilik ornamaıynsha Túrkııa NATO-nyń Izraılmen yntymaqtastyq bastamalaryn maquldamaıdy.
Sózin aıaqtaı kele Erdoǵan Túrkııanyń Shanhaı Yntymaqtastyq Uıymyna tolyq múshe bolýdy kózdep otyrǵanyn tilge tıek etti.
«Endi Túrkııa Shanhaı Yntymaqtastyq uıymyna tolyq múshe retinde qosylýy kerek. Men turaqty múshelerden osy másele boıynsha qoldaý suradym», — dedi Túrkııa kóshbasshysy.
Cumhurbaşkanı Erdoğan: Gözlemci üye olarak değil, hedefimiz orada daimi üye olmaktır. Türkiye, artık Şanghay Beşlisi'ne daimi üye olarak katılmalıdır. pic.twitter.com/q53QOIcOLx
— TRT Haber Canlı (@trthabercanli) July 11, 2024
Eske sala keteıik, osy aıdyń basynda Astanada ótken Shanhaı Yntymaqtastyq Uıymynyń 24-shi sammıtine Rejep Taııp Erdoǵan seriktes eldiń basshysy retinde qatysqan bolatyn.
Erdoǵan Túrkııa terrorızmge qarsy kúreste ShYU-men dıalogty damytýǵa múddeli ekenin basa aıtty. Onyń atap ótýinshe, osyndaı terrorızm aktileriniń saldarynan mıllıondaǵan adam bosqynǵa aınaldy. Tek Túrkııanyń ózinde 4 mln bosqyn bar.
«Atajurtymyz — Ortalyq Azııa elderimen ár salada ortaq paıda negizindegi yntymaqtastyqty damytýǵa daıynbyz ári múddelimiz. ShYU Azııa elderimen dıalog ornatýǵa óte yńǵaıly platformalardyń biri ekenin atap ótkim keledi», — dedi ol.
Osy jıynda Erdoǵan Reseı Prezıdenti Vladımır Pýtınmen kelissóz júrgizdi.
