Túrkııa, Saýd Arabııasy jáne Pákistan qorǵanys týraly úshjaqty kelisimge qol qoıdy
ASTANA. KAZINFORM — Túrkııa, Saýd Arabııasy jáne Pákistan birlesken qaýipsizdikti nyǵaıtý, áskerı yntymaqtastyqty damytý jáne taraptardyń birine qarýly shabýyl jasalǵan jaǵdaıda is-qımyldy úılestirý týraly kelisimge keldi, dep habarlaıdy Kazinform agenttiginiń Ankaradaǵy menshikti tilshisi.
Mekke qalasynda Túrkııa Prezıdenti Rejep Taııp Erdoǵan, Saýd Arabııasynyń taq murageri Muhammed ben Salman jáne Pákistan Premer-mınıstri Shahbaz Sharıf birlesken qorǵanys týraly úshjaqty kelisimge qol qoıdy.
Birlesken málimdemege sáıkes, qujat tarıhı baılanystarǵa, strategııalyq múddelerge jáne ujymdyq qaýipsizdikti nyǵaıtý nıetine negizdelgen. Kelisimniń negizgi qaǵıdalarynyń biri – úsh eldiń birine jasalǵan qarýly shabýyl barlyq qatysýshyǵa jasalǵan shabýyl retinde qarastyrylatyny.
Sondaı-aq qujat qorǵanys ónerkásibi salasyndaǵy yntymaqtastyqty keńeıtýdi, qarýly kúshterdiń ózara úılesimdiligin arttyrýdy jáne qaýipsizdik baǵytyndaǵy yqpaldastyqty damytýdy kózdeıdi.
Sonymen birge kelisimniń tek qorǵanys sıpatynda ekeni atap ótildi. Ol qandaı da bir memleketke qarsy baǵyttalmaǵan jáne Túrkııanyń NATO-ǵa músheligin qosa alǵanda, qoldanystaǵy odaqtastyq mindettemelerin almastyrmaıdy.
Árbir jaǵdaıda qarýly kúshterdi paıdalaný týraly sheshim ulttyq zańnama men konstıtýtsııalyq rásimderge sáıkes qabyldanady.
Buǵan deıin Túrkııa men Sırııanyń jańa áskerı kelisimge qol qoıýǵa daıyndalyp jatqany habarlanǵan bolatyn.
