Túrkııa Reseıden alǵan S-400-di Irak shekarasyna jaqyn ornalastyrýy múmkin
ASTANA.KAZINFORM — Túrkııa Reseıden satyp alǵan S-400 zenıtti-zymyran keshenin kórshi Irakpen shekara syzyǵyna ornalastyrýy múmkin, dep jazady TASS.
Türkiye basylymynyń habarlaýynsha, shekara aımaǵyna S-400-di ornalastyrý protsesi musylmandardyń Qurban aıt merekesi aıaqtalǵannan keıin nemese kelesi aptada júrgizilýi múmkin.
Sondaı-aq, gazet Túrkııa Iraktyń soltústigin Kúrdistannyń jumysshy partııasynan tazartý maqsatynda transshekaralyq operatsııa júrgizý josparlaryn daıyndaýdy aıaqtaǵanyn, aımaqqa áskerı bólimsheler men tyl bólimderin aýystyrý bastalǵanyn habarlaıdy. Basylymnyń habarlaýynsha, operatsııa túrik prezıdenti Rejep Taıyp Erdoǵannyń Irakqa saparynan keıin jasalýy múmkin. Sapar 22 sáýirge josparlanǵan.
Erdoǵan budan buryn Túrkııa jazǵa qaraı Irakpen shekara syzyǵyn tolyǵymen baqylaýǵa alyp, Sırııadaǵy lańkestikpen kúres jumysyn aıaqtaıtynyn málimdegen. Iraktaǵy operatsııanyń maqsaty - soltústik aımaqtardy 40 shaqyrym tereńdikke deıin Kúrdistan sodyrlarynan tazartý bolmaq.
Star gazetiniń habarlaýynsha, armııa operatsııasy aldynda shekaralyq aımaqtarda qaýipsizdik aımaqtary qurylyp, keıinnen jandarmerııa bólimsheleriniń baqylaýyna ótedi. Operatsııaǵa negizinen qurlyq áskerleriniń arnaıy jasaqtary men jandarmerııa áskerleri qatysady. Olarǵa Túrkııa áýe kúshteri áýeden qoldaý kórsetip, birinshi kezekte Kúrdistan jumys partııasynyń negizgi kúshteri ornalasqan Kandıl jáne Gara aımaqtaryna soqqy beredi.
Túrkııa bıligi KJP-ny ulttyq qaýipsizdikke tóngen basty qaýip dep sanaıdy. Respýblıka armııasy Iraktyń soltústiginde jáne 2015 jyldan beri Sırııanyń soltústik aımaqtarynda kúrd sodyrlaryna qarsy operatsııalardy júıeli túrde júrgizip keledi.
