Túrkııa Prezıdentiniń er men áıel teńsizdigi týraly sózi daýǵa aınaldy
ASTANA. QazAqparat - Túrkııa Prezıdenti Redjep Taıyp Erdoǵan er men áıeldiń teńdigi múmkin emes degen pikir aıtyp, taǵy da synǵa ilikti, dep jazdy «The Guardian» Assoshıeıted Presske silteme jasaı otyryp.
Stambýldaǵy áıel quqyǵyna arnalǵan buqaralyq sharada Túrkııa Prezıdenti er men áıeldiń arasyndaǵy bıologııalyq erekshelikterge baılanysty olardyń teń emestigin aıtqan.
«Er men áıeldiń ádeti de, qylyqtary da, dene bitimi de bólek. Bala emizetin áıeldi, erkekpen teńeýge bolmaıdy. Áıelder erkekter atqaratyn keı jumystardy jasaı da almaıdy. Áıelge jer jyrtqyzýdyń qajeti joq. Ol onyń názik bolmysyn buzady. Áıeldi qurmetteý kerek, men anamnyń aıaǵyn súıer edim», degen ol túrik femınısterin synaǵan. Ol ana qadirin tereń túsinip, ıslamdaǵy ornyn baǵalaý kerektigin aıtty, dep jazady «RIA Novostı». .
Kóptegen basylymdar túrik basshysynyń «gendirlik teńdiktiń bolýy múmkin emes» degen paıymyn osyǵan deıin de aıtqanyn eske saldy. San-Frantsıskonyń SFGate basylymy jazǵandaı, osyǵan deıin Erdogan ár áıelde kem degende úsh bala týýy kerek degen. Sondaı-aq, ol jasandy túsik jasatý men zınaqorlyqqa qarsy shyqqan.
Erdogannyń málimdemesi áleýmettik jelilerde de qyzý talqylandy. Quqyqqorǵaýshy Gýlııa Gýlbahardyń aıtýynsha, Túrkııa prezıdenti genderlik teńdik týraly pikirimen el konstıtýtsııasyna, túrik zańdary men halyqaralyq konventsııalarǵa qaıshy keldi.
