Túrkııa prezıdenti qazaq ofıtserine dıplom tabystady
ANKARA. KAZINFORM – Túrkııa Respýblıkasynyń astanasy — Ankarada Jandarmerııa jáne jaǵalaý kúzeti Akademııasy túlekteriniń saltanatty shyǵarylymy ótti. Bul týraly Ulttyq ulannyń baspasóz qyzmeti habarlady.
Túlekter qatarynda Qazaqstan Respýblıkasy ІІM Ulttyq ulanynynyń toǵyz jas ofıtseri de bar.
Іs-sharanyń mártebeli qonaǵy retinde Túrkııa Respýblıkasynyń Prezıdenti qatysty. Rejep Taıyp Erdoǵan Ulttyq ulannyń leıtenanty Ashat Sultanahmetke Akademııa dıplomyn óz qolymen tabystady. Bul oqıǵa Qazaqstan men Túrkııa arasyndaǵy yntymaqtastyqtyń aıqyn kórinisi boldy.
Túrkııa tarapynyń resmı shaqyrýy boıynsha saltanatty rásimge elimizdiń quqyqtyq tártip áskerinen arnaıy delegatsııa qatysty. Delegatsııany Іshki ister mınıstriniń orynbasary – Ulttyq ulannyń Bas qolbasshysy general-maıor Ańsaǵan Baltabekov bastap bardy.
Sapar barysynda qazaqstandyq ókilder Jandarmerııa jáne jaǵalaý kúzeti Akademııasynyń jeke quramdy daıarlaý júıesimen jáne zamanaýı áskerı bilim berý ádistemelerimen tanysty. Sonymen qatar delegatsııa Jandarmerııanyń Logıstıka qolbasshylyǵynda, arnaıy maqsattaǵy JÖAK bólimshesiniń oqý ortalyǵynda, sondaı-aq baılanys elektrondyq júıeleri men aqparattyq júıelerdi basqarý ortalyǵyn kórdi.
Sapar barysynda Ańsaǵan Skendiruly Jandarmerııanyń bas qolbasshysy armııa generaly Alı Chardakchymen kezdesti.
Ulttyq ulannyń bas qolbasshysynyń Túrkııaǵa sapary áskerı saladaǵy ekijaqty yntymaqtastyqty damytýdaǵy mańyzdy qadam.
Bul sapar tájirıbe almasýǵa, kásibı baılanystardy nyǵaıtýǵa jáne Qazaqstan Respýblıkasy Ulttyq ulany men Túrkııa Jandarmerııasy arasyndaǵy ózara is-qımyldy odan ári nyǵaıtýǵa jol ashty.
Aıta ketelik áskerge shaqyrylǵandardy kósheden ustap áketýge tyıym salynǵany jóninde jazǵan edik.