Túrkııa prezıdent ákimshiligi Erdoǵannyń aýyryp qalǵany týraly aqparatty joqqa shyǵardy

ANKARA. QazAqparat - Prezıdent ákimshiliginiń kommýnıkatsııa departamentine qarasty jalǵan aqparatpen kúres ortalyǵy el basshysynyń aýrýhanada jatqany jaıly aqparatty teriske shyǵardy, dep habarlaıdy QazAqparat.

Bul jaıynda atalmysh ortalyqtyń keshe Twitter-de jarııalaǵan jazbasynda aıtylǵan.

«Prezıdent Rejep Taıyp Erdoǵannyń júrek ustamasy ustap, aýrýhanaǵa jatqyzylǵany týraly aqparat shyndyqqa janaspaıdy. Qurmetti el basshysy 27 sáýirde «Akkýıý» atom elektr stansasynan alǵashqy otyn jóneltý saltanatty sharasyna Ankaradaǵy keńsesinen tikeleı baılanys arqyly qatysady» delingen habarlamada.

Keıinnen eldiń vıtse-prezıdenti Fýat Oktaı málimdeme jasap, prezıdenttiń densaýlyǵy óte jaqsy ekenin aıtty.

«Únemi baılanystamyz, azdap sýyq tıip qaldy» dedi ol.

Eske sala keteıik, keshe Rejep Taıyp Erdoǵan telearnaǵa suhbat berip otyryp, ózin jaısyz sezingen soń tikeleı efır ortasynan úzilgeni habarlanǵan edi.