Túrkııa porttarynan Qazaqstanǵa júk tasymaldaý jeńildeıdi
ASTANA. KAZINFORM — Qazaqstandyq tasymaldaýshylarǵa Túrkııa porttarynan júk tıeýge ruqsat beriledi, dep habarlaıdy Avtomobıl kóligi jáne kóliktik baqylaý komıtetiniń baspasóz qyzmeti.
Antalıa qalasynda Qazaqstan-Túrkııa avtomobıl kóligi jónindegi aralas komıssııasynyń otyrysy ótti.
Otyrys qorytyndysy boıynsha eki el arasyndaǵy halyqaralyq avtomobıl tasymaldary men tranzıtti odan ári damytý boıynsha naqty ýaǵdalastyqtarǵa qol jetkizildi.
— Taraptar elektrondyq ruqsattarǵa sandyq shekteý qoıylmaıtyny týraly ýaǵdalasty. Bul kelisim tasymaldardy neǵurlym ıkemdi uıymdastyrýǵa jáne tasymaldaýshylardyń qajettilikterine jedel den qoıýǵa múmkindik beredi. Mańyzdy nátıjelerdiń biri — qazaqstandyq tasymaldaýshylarǵa Túrkııanyń teńiz porttarynan Qazaqstanǵa keıinnen tasymaldaý úshin júkterdi tıeýge múmkindik berilýi, — delingen habarlamada.
Sondaı-aq taraptar 2026 jyldan bastap osyndaı tranzıttik júkterdi tasymaldaýǵa jyl saıyn 3 myńnan ruqsat blankilerimen ózara almasýǵa kelisti.
Otyrysqa qatysýshylar ekijaqty jáne tranzıttik tasymaldardy odan ári damytýdyń mańyzdylyǵyn atap ótip, olardyń Qazaqstan men Túrkııa arasyndaǵy saýda-ekonomıkalyq yntymaqtastyqty keńeıtýge jáne kólik-logıstıkalyq baılanystardy nyǵaıtýǵa qosatyn úlesin atap ótti.
Kezdesý qorytyndysy boıynsha taraptar qol jetkizilgen ýaǵdalastyqtarǵa qanaǵattanýshylyq bildirip, halyqaralyq avtomobıl tasymaldary salasyndaǵy yntymaqtastyqty odan ári damytýǵa múddeli ekenderin rastady.
Budan buryn Túrkııada aıaq kıim óndirisi úsh jylda 41,6 paıyzǵa azaıǵany belgili boldy.
