Túrkııa parlamenti Fınlıandııanyń NATO-ǵa kirýi týraly hattamany maquldady
Bul týraly QazAqparat TASS aqparat agenttigine silteme jasap habarlaıdy.
Otyrysqa qatysqan 276 adamnyń barlyǵy zań jobasyn qoldady. Osylaısha Fınlıandııa odaqqa tolyq kirý úshin zańdy negiz aldy.
Túrkııa Helsınkıdiń alıansqa qosylý usynysyn maquldamaǵan NATO-nyń sońǵy múshesi boldy. Vengrııa bul protsesti keıinge qaldyrdy, biraq 27 naýryzda tıisti zań jobasyn maquldady. Endi uıymnyń barlyq músheleri Fınlıandııanyń kandıdatýrasyn maquldady.
Plenarlyq otyrys barysynda túrik depýtattary qazirgi kezeńde Ankaranyń lańkestikpen kúres salasyndaǵy múddelerin eskerý turǵysynan Túrkııa men Fınlıandııa arasyndaǵy qarym-qatynasta kúrdeli problemalar joq ekenin atap ótti. Bul rette zań shyǵarýshylar Fınlıandııamen birge NATO-ǵa múshelikke ótinish bergen Shvetsııanyń Túrkııamen qol qoıylǵan memorandým erejelerin áli oryndamaǵanyn jáne áli de alıanstyń bir bóligi bolýǵa daıyn emestigin atap ótti.
Fınlıandııa men Shvetsııa Soltústikatlantıkalyq alıansqa múshelikke ótinishin 2022 jyldyń mamyr aıynda bergen, biraq Ankara olardan kúrd uıymdaryn terrorıstik dep jarııalaýdy, sondaı-aq terrorızm nemese 2016 jyly Túrkııadaǵy tóńkeris áreketine qatysty dep aıyptalǵan adamdardy ekstradıtsııalaýdy talap etip, qosylý protsesine tosqaýyl qoıdy. Bul máselelerdi 2022 jyly NATO sammıtine deıin sheshý úshin Túrkııa, Fınlıandııa jáne Shvetsııa arasynda naqty qadamdar tizimi bar memorandýmǵa qol qoıyldy.
