Túrkııa parlamenti Shvetsııanyń NATO-ǵa kirýin maquldady

ANKARA. KAZINFORM - Túrik parlamenti birneshe ret keıinge qaldyryp kelgen máselege núkte qoıdy. Depýtattar basym daýyspen Shvetsııanyń NATO-ǵa kirýin maquldady (287-ge qarsy 55 daýys), dep habarlaıdy VVS. 

Túrkııa basshysy Rejep Taııp Erdoǵan aldaǵy kúnderi ratıfıkatsııalyq qujatqa qol qoıady dep kútilip otyr.

Ondaǵan jyldar boıy áskerı odaqtarǵa qosylmaǵan Shvetsııa Reseıdiń Ýkraınaǵa agressııasy bastalǵannan keıin 2022 jyly Fınlıandııamen birge NATO-ǵa qosylý jóninde ótinish berdi.

NATO músheleriniń kópshiligi eki eldiń de alıansqa qabyldanýyn tez arada ratıfıkatsııalady, biraq Shvetsııany Kúrdistan jumysshy partııasynyń múshelerine baspana berdi dep aıyptaǵan Túrkııa bul protsesti keıinge qaldyrdy.

Nátıjesinde Fınlıandııa ótken jyldyń sáýir aıynda NATO-ǵa tolyqqandy múshe boldy, al Shvetsııa qosylý protsesin osy kúnge deıin aıaqtaı almady.

«Búgin biz NATO-nyń tolyq músheligine taǵy bir qadam jaqyndadyq», — dep jazdy Shvetsııa premer-mınıstri Ýlf Krısterssen áleýmettik jelide.

Shvetsııanyń ótinishin Majarstan áli ratıfıkatsııalaǵan joq: el premer-mınıstri Vıktor Orban seısenbide áriptesin osy másele boıynsha kelissóz júrgizýge Býdapeshke shaqyrdy.

Alaıda Shvetsııa Syrtqy ister mınıstri Tobıas Bıllstrem qazir vengrııalyq tarappen birdeńe  talqylaýǵa eshqandaı sebep kórip turmaǵanyn aıtty.

NATO Bas hatshysy Iens Stoltenberg túrik parlamentiniń sheshimin quptap, Majarstannyń da aldaǵy ýaqytta Stokgolm ótinishin qoldaıtynyna úmit bildirdi.

«Men Majarstannyń ratıfıkatsııany múmkindiginshe tezirek aıaqtaýyn kútemin. Shvetsııanyń músheligi NATO-ny kúsheıtip, bárimizdi qaýipsiz etedi», — dedi ol.