Túrkııa Pákistan jáne Saýd Arabııasymen qorǵanys salasyndaǵy kelisimdi maquldady
ASTANA. KAZINFORM — Túrkııa parlamenti Túrkııa, Pákistan jáne Saýd Arabııasy arasyndaǵy qorǵanys jáne qaýipsizdik salasyndaǵy yntymaqtastyq týraly Mekke kelisimin maquldady.
Qujatty ratıfıkatsııalaýdy bıliktegi Ádilet jáne damý partııasynyń, Ultshyl qozǵalys partııasynyń jáne oppozıtsııalyq Respýblıkalyq halyq partııasynyń depýtattary qoldady.
Túrkııanyń TRT Haber basylymynyń habarlaýynsha, kelisim úsh el arasyndaǵy áskerı yntymaqtastyqty keńeıtýdi, qorǵanys ónerkásibin damytýdy jáne terrorızmge qarsy birlesip kúresýdi kózdeıdi. Taraptar áskerı tehnologııalarmen almasýǵa, birlesken kásiporyndar qurýǵa, qarý-jaraq ázirlep, óndirýge, sondaı-aq ortaq ǵylymı-zertteý jobalaryn júzege asyrýǵa nıetti.
Budan bólek, Túrkııa, Pákistan jáne Saýd Arabııasy birlesken áskerı jattyǵýlar uıymdastyryp, áskerı qyzmetshilermen almasýdy jáne áskerı daıyndyq baǵdarlamalaryn ótkizýdi josparlap otyr. Sondaı-aq barlaý málimetterimen almasýǵa jáne óńirlik qaýipsizdik salasyndaǵy is-qımyldy úılestirýge basymdyq beriledi.
Qujatta ózara logıstıkalyq qoldaý kórsetý de qarastyrylǵan. Onyń ishinde beıbit jáne soǵys ýaqytynda qarý-jaraq, oq-dári, janarmaı, qosalqy bólshekter men áskerı jabdyqtar jetkizý kózdelgen.
Yntymaqtastyqty úılestirý úshin Strategııalyq saıası jáne qorǵanys komıteti qurylady. Onyń quramyna úsh eldiń syrtqy ister jáne qorǵanys mınıstrleri, sondaı-aq bas shtab basshylary kiredi. Komıtet jylyna eki ret jınalady. Hatshylyǵy Saýd Arabııasynda ornalasady, al alǵashqy bas hatshy Pákistan azamaty bolady.
Kelisimge úsh taraptyń da kelisimimen basqa memleketter qosyla alady.
Qujat barlyq tarap ulttyq bekitý rásimderin aıaqtaǵannan keıin kúshine enedi. Kelisimniń qoldanylý merzimi shektelmeıdi. Alaıda odan shyǵý úshin qujat kúshine engen kúnnen bastap keminde on jyl ótýi kerek. Bul rette qalǵan qatysýshylarǵa keminde úsh aı buryn habarlaý qajet.
Buǵan deıin Túrkııa, Saýd Arabııasy, Pákistan jáne Iran óńirlik máseleler, sonyń ishinde beıbitshilik pen qaýipsizdik salasyndaǵy yntymaqtastyqty nyǵaıtý úshin dıalogty jalǵastyrýǵa keliskenin jazǵan edik.