Túrkııa ótken jyly 180 mádenı jádigerin elge qaıtardy

ASTANA. KAZINFORM — 2025 jyly Túrkııaǵa 180 mádenı qundylyq qaıtarylǵan, al 2002–2025 jyldar aralyǵynda repatrıatsııalanǵan artefaktilerdiń jalpy sany 13 448-ge jetkeni týraly Túrkııa mádenıet jáne týrızm mınıstri Mehmet Nýrı Ersoı aıtty, dep habarlaıdy Anadoly.

Ersoı áleýmettik jelidegi paraqshasynda 2025 jyly Mádenı qundylyqtar men mýzeıler basqarmasynyń kontrabandamen kúres jónindegi bólimi mádenı murany qorǵaýǵa naqty nátıjeler arqyly adaldyǵyn taǵy bir márte kórsetkenin atap ótti.

Mınıstrdiń sózinshe, shetelge zańsyz shyǵarylǵan artefaktiler ǵylymı saraptama, zańdyq jáne dıplomatııalyq rásimder aıasynda kezeń-kezeńimen anyqtalyp, elge qaıtarylyp jatyr. Mýzeı, aýktsıon men jeke kollektsııalar muqııat tekserilip, quqyqtyq protsester halyqaralyq yntymaqtastyqpen júrgiziledi.

2025 jyly elge qaıtarylǵan mańyzdy jádigerlerdiń biri — Býrdýr provıntsııasyndaǵy Býbon ejelgi qalasynan shyqqan Mark Avrelııdiń mystan jasalǵan músini, ol AQSh-tan jetkizilgen.

Qazirgi ýaqytta eksponat Prezıdenttik ulttyq kitaphanadaǵy «Arheologııanyń altyn ǵasyry» kórmesinde kórermen nazaryna usynylǵan.

Sonymen qatar, Shveıtsarııamen yntymaqtastyq aıasynda Sankt-Gallen kantonynan alynǵan jeti anatolııalyq artefakt Túrkııaǵa qaıtarylǵan. 1268 jylǵa tıesili Ibn-ı Berredjanǵa qatysty «Kıtab Sherhý’l-Esma» qoljazbasy Bahreınnen erikti túrde qaıtarylyp, 3 shildede Konıadaǵy ıÝsýf Aga qoljazbalar kitaphanasyna tapsyrylǵan.

Nıý-Iork qalasynda ótken rásimderde Túrkııaǵa Ýrartý dáýiriniń mystan beldigi, buqa basy bar bas kıimderi, Lıdııa dáýiriniń kúmis fıalasy, rım dáýiriniń saýytty ımperatorynyń músini jáne 83 anatolııalyq monetalar qaıtarylǵan.

Ersoı ár qaıtarylǵan jádiger tarıhty, estelikti jáne mádenı egemendikti qorǵaýdyń aıqyn dáleli ekenin atap ótti.

— Mádenıet, óner jáne týrızmdi birtindep nyǵaıta otyryp, biz birge «Túrkııa dáýirin» quryp jatyrmyz, — dep qorytyndylady mınıstr.

Aıta ketelik Qytaıdyń týrısteri Túrkııaǵa vızasyz kire alatyny týraly jazǵan edik.