Túrkııa: ósim bar, ınflıatsııa údeı tústi
ASTANA. KAZINFORM – Túrkııa bıligi Ramazan aıynda azyq-túlik ınflıatsııasynyń kúsheıgenin moıyndady, al ekonomıster baǵanyń ári qaraı ósýin boljap otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Qarjy jáne qazyna mınıstri Mehmet Shımshek Ramazan kezeńinde eldegi baǵa kóptegen memlekettegideı tómendemeı, kerisinshe ósip jatqanyn aıtty. Onyń sózinshe, qazirgi ınflıatsııaǵa negizgi úlesti azyq-túlik sektory qosyp otyr. Sonymen qatar mınıstr aldaǵy aılarda ınflıatsııalyq qysym álsireıtinine senim bildirdi.
AA Finans agenttiginiń aqpanda júrgizgen saýalnamasyna sáıkes, aılyq ınflıatsııa boıynsha ortasha boljam 2,87%. Jyldyq kórsetkish qańtardaǵy 30,65%-dan aqpanda 31,42%-ǵa deıin ósedi dep kútilýde. Zertteýge qatysqan 33 ekonomıstiń aılyq dınamıkaǵa qatysty baǵalaýy 2,30%-dan 3,39%-ǵa deıin ózgergen.
Túrkııa statıstıka ınstıtýty (TÜİK) jarııalaǵan resmı derekterge sáıkes, aqpanda ınflıatsııa 2,96%-dy, al jyldyq kórsetkish 31,53% boldy. 2026 jyldyń sońyna arnalǵan ınflıatsııa boıynsha ortasha boljam qazir 24,16% deńgeıinde. Bul bıznes pen sarapshylar arasynda joǵary ınflıatsııalyq kútýlerdiń saqtalyp otyrǵanyn kórsetedi.
Inflıatsııalyq qysymǵa qaramastan, el ekonomıkasy ósimin jalǵastyryp otyr. Túrkııa statıstıka ınstıtýty (TÜİK) derekterine sáıkes, 2025 jyly Túrkııanyń JІÓ-si 3,6%-ǵa artqan, al tórtinshi toqsanda ósim 3,4% bolǵan. Osylaısha, oń dınamıka qatarynan 22 toqsan boıy saqtalyp otyr. Aǵymdaǵy baǵamen eseptegende JІÓ kólemi 41,3%-ǵa ulǵaıyp, 63 trln túrik lırasyna jetken.
Senimniń qosymsha belgisi retinde japonııalyq Rating and Investment Information (R&I) agenttigi Túrkııanyń shetel valıýtasyndaǵy uzaq merzimdi kredıttik reıtıngin BB--dan BB-ǵa deıin kóterip, boljamdy «turaqty» dep belgiledi. Bul sońǵy segiz jyldaǵy alǵashqy reıtıngtiń kóterilýi.
Osylaısha, Túrkııa ekonomıkasy qarama-qaıshy kórinis kórsetip otyr: JІÓ-niń turaqty ósimi men kredıttik baǵalaýdyń jaqsarýy saqtalyp turǵan ınflıatsııalyq qysymmen, ásirese azyq-túlik sektoryndaǵy baǵa ósimimen qatar júrýde. Bılik aldaǵy aılarda ınflıatsııalyq úrdisti tejeı ala ma degen másele ázirge ashyq kúıinde qalyp otyr.
Aıta ketelik Túrkııanyń oıyn ındýstrııasy $1 mlrd-tan asty.