Túrkııa ortalyq banki negizgi stavkany 8,5 paıyzdan birden 15% kóterip jiberdi

ASTANA. QazAqparat – Túrkııa ortalyq banki negizgi mólsherlemeni 650 bazıstik pýnktige, 8,5 protsentten 15-ke deıin kóterdi, dep habarlaıdy QazAqparat Anadoly agenttigine silteme jasap.

Sheshim Túrkııa ortalyq banki qarjy saıasaty keńesiniń búgingi otyrysynyń qorytyndysy boıynsha jarııalandy.

Turaqtandyrýshy bank qarjy-nesıe saıasatyn qatańdatý protsesi bastalatynyn habarlady.

«Naryq mehanızmi tıimdiligin joǵarylatý jáne makro-qarjy turaqtylyǵyn nyǵaıtý boıynsha qadamdar jasalady. Qarjy-nesıe saıasatyn qatańdatý kezeń-kezeńimen ınflıatsııa salasyndaǵy jaǵdaı jaqsarǵanǵa deıin jalǵasady», - dep habarlady OB ókilderi.

Turaqtandyrýshy túrli elderdiń ortalyq bankteri ınflıatsııa dárejesin tómendetý boıynsha shara qoldanyp jatqanyn aıtyp, jahandyq úrdiske nazar aýdartty.

Osyǵan baılanysty Túrkııada jyldyq ınflıatsııany 5 protsentke jetkizetin ortasha jedel maqsattyń mańyzy atap ótildi.

«Ortalyq bank ınflıatsııany baqylap otyrady jáne eldegi baǵa turaqtylyǵyn qamtamasyz etý úshin qolda bar quraldardyń bárin paıdalanady», - delingen keńes málimdemesinde.