Túrkııa Ortalyq bankiniń rezervteri 141 mlrd dollarǵa deıin tómendedi

ASTANA. KAZINFORM – Túrkııa Ortalyq banki (TOB) jańartylǵan aqsha-kredıt jáne bank statıstıkasyn jarııalady. Agenttik tilshisiniń habarlaýynsha, bul málimetter eldiń valıýta jáne altyn-valıýta rezervteriniń edáýir azaıǵanyn kórsetip otyr.

Resmı derekterge sáıkes, 2025 jylǵy 25 sáýirde aıaqtalǵan aptada TOB-tyń jalpy valıýta rezervteri 5 mlrd dollarǵa qysqaryp, 64 mlrd dollardan 59 mlrd dollarǵa deıin azaıǵan. Bul – bıylǵy eń iri aptalyq tómendeýlerdiń biri.

Altyn-valıýta rezervteri de kemigen. Bir apta ishinde bul kórsetkish 452 mln dollarǵa azaıyp, 82 mlrd 252 mln dollardan 81 mlrd 800 mln dollarǵa deıin qysqardy.

Osylaısha, 2025 jylǵy 25 sáýirdegi jaǵdaı boıynsha Túrkııa Ortalyq bankiniń jıyntyq halyqaralyq rezervteri 141 mlrd 50 mln dollardy qurady.

Sarapshylardyń baǵalaýynsha, rezervterdiń azaıýy Túrik lırasynyń aıyrbas baǵamyn turaqtandyrý úshin jasalyp jatqan ınterventsııalarmen nemese shetel valıýtasyndaǵy ózge de qarjylyq mindettemelermen baılanysty bolýy múmkin.

Sonymen qatar, Túrkııanyń qarjy mınıstri Mehmet Shımshek eldiń aǵymdaǵy shotynyń saldosy altyn ımporty esepke alynbaǵan jaǵdaıda oń nátıje kórsetip otyrǵanyn aıtty. Onyń aıtýynsha, altyndy esepteýlerge qosý oryndy emes.

— Eger altyndy esepke almasaq, tapshylyq joıylady. Bizde 2 mlrd dollar kóleminde profıtsıt bar. Altyn óndiriste paıdalanylmaıdy, taǵamdyq quny joq, ishiletin sýsyn retinde de tutynylmaıdy. Sondyqtan ol aǵymdaǵy shot tapshylyǵyn anyqtaıtyn faktor retinde qarastyrylmaýy tıis, — dedi Shımshek.

Buǵan deıin Túrkııa men Lıvııa ózara saýda kólemin jylyna $10 mlrd deıin jetkizýdi josparlap otyrǵanyn jazǵan edik.