Túrkııa Ortalyq bankiniń rezervi rekordtyq 180,1 mıllıard dollarǵa jetti

ASTANA.KAZINFORM - Túrkııa Ortalyq bankiniń jalpy halyqaralyq rezervi rekordtyq deńgeıge deıin ósti, dep habarlaıdy Kazinform agenttiginiń menshikti tilshisi.

Ósý valıýtanyń quramdas bóliginiń tómendeýine qaramastan baıqaldy. Eldiń bas qarjy retteýshisiniń resmı statıstıkasy sońǵy esepti kezeńde dollar qory 1,85 mıllıard dollarǵa azaıǵanyn habarlady. Bul rette altyn qorlary aıtarlyqtaı ósýdi kórsetti – shamamen 3,6 mlrd dollarǵa, bul qorlardyń jalpy ulǵaıýynyń negizgi draıveri boldy.

Ekonomıster altyn qorynyń ósýin aktıvterdi ártaraptandyrý saıasaty men álemdik qarjy naryqtaryndaǵy turaqsyzdyq jaǵdaıynda Túrkııa pozıtsııasynyń nyǵaıýymen baılanystyrady.

Halyqaralyq rezervterdiń qazirgi deńgeıi el úshin rekordtyq kórsetkish bolyp sanalady jáne ınflıatsııa men ulttyq valıýta baǵamynyń qubylýymen jalǵasyp jatqan kúres jaǵdaıynda ınvestorlardyń túrik ekonomıkasyna senimin nyǵaıta alady.

Buǵan deıin Túrkııanyń Ortalyq banki negizgi paıyzdyq mólsherlemeni 250 bazıstik tarmaqqa tómendetip, ony 40,5%-ǵa jetkizý týraly sheshim qabyldaǵanyn jazǵan bolatynbyz.