Túrkııa Ormýz buǵazy jabylǵan jaǵdaıda balama joldardy anyqtap jatyr
ASTANA. KAZINFORM — Túrkııa «Orta dáliz» jáne «Damý joly» sııaqty logıstıkalyq jobalardy júzege asyrý ústinde. Bul týraly eldiń Kólik mınıstrliginiń basshysy Abdıýlkadır Ýraloglý málimdedi, dep habarlaıdy TASS.
Ormýz buǵazy Parsy shyǵanaǵy men Oman shyǵanaǵyn baılanystyryp otyr, bul aımaqta munaı men gazǵa baı Bahreın, Irak, Iran, Qatar, Kýveıt jáne Saýd Arabııasy ornalasqan.
— Ormýz buǵazy jabylǵan jaǵdaıda bizde qurlyq jáne teńiz joldary bolýy kerek. Sondyqtan biz «Ortalyq dáliz» jáne «Damý joly» jobalaryn júzege asyrý úshin qajettiniń barlyǵyn jasap jatyrmyz. Bizdiń aýmaq arqyly «Damý jolynyń» 2,1 myń shaqyrymy ótip jatyr, biz oǵan 24 mlrd dollarǵa jýyq ınvestıtsııa salamyz. Biz sondaı-aq Orta dálizdi nyǵaıtýǵa umtylyp jatyrmyz, onyń 2,2 myń shaqyrymy bizdiń aýmaq arqyly ótedi. Onyń belgili bir bólikteriniń qurylysyn aıaqtadyq, — dep keltirdi mınıstrdiń sózin Hürriyet gazeti.
Ýraloglýnyń aıtýynsha, «Damý joly» salynǵannan keıin Eýropaǵa júkterdi jetkizý merzimi 25 kúnge, al Orta dáliz arqyly — 13 kúnge deıin qysqarady.
Orta (Transkaspıı) halyqaralyq kólik baǵyty Qytaıdan Eýropa elderine Qazaqstan, Túrikmenstan, Ázerbaıjan, Grýzııa, Túrkııa arqyly ótedi. Tasymaldaýǵa temir jol jáne teńiz kóligi (Kaspıı teńizi arqyly) jumyldyrylǵan. Baǵdar uzaqtyǵy — 11 myń km, ótkizý qabileti — jylyna 4,5 mln tonnadan 27 mln tonnaǵa deıin.
Eýropa men Azııa arasyndaǵy úzdiksiz kólik baılanysyn qamtamasyz etetin «Damý joly» jobasyn Irak bıligi 2023 jyly bastady. «Damý joly» aıasynda Irakty kórshiles eldermen baılanystyratyn joǵary jyldamdyqty avtomobıl joldaryna qosylǵan 1200 shaqyrymnan astam temir joldar jańartylyp, salynady. 2024 jyldyń sáýir aıynda Túrkııa, Irak, BAÁ jáne Qatar arasynda halyqaralyq kólik-logıstıkalyq júıe qurý jobasy boıynsha memorandýmǵa qol qoıyldy. Ol 17 mlrd dollarǵa baǵalanyp otyr.
Buǵan deıin Iran saýda kemeleri úshin Ormýz buǵazyn jappaýǵa ýáde bergenin jazǵan bolatynbyz.
Kazinform úshin arnaıy TASS seriktes agenttigi usynǵan.