Túrkııa orman órtterin sóndiretin ushqyshsyz apparattar ázirlep jatyr

ASTANA. KAZINFORM — Túrkııa orman órtteriniń oshaǵyna sý shashýǵa qabiletti ushqyshsyz ushý apparattaryn jasaýǵa kiristi.

Túrkııa orman órtterin sóndiretin ushqyshsyz apparattar ázirlep jatyr
Foto: aksam.com.tr

Bul jóninde Aýyl jáne orman sharýashylyǵy mınıstri Ibrahım ıÝmakly Ystanbulda jýrnalıstermen kezdesýinde aıtty. Onyń sózinshe, joba qorǵanys ónerkásibi ókilderimen birlesip júzege asyp jatyr. Jańa apparattar áýeden órt sóndirýge múmkindik beredi.

Mınıstrdiń sózinshe, Túrkııa orman órtterin boljaý jáne aldyn alý úshin jasandy ıntellektini de paıdalanady. Arnaıy sheshim qabyldaý júıesi órttiń yqtımal taralý baǵytyn taldap, qaýip joǵary aýmaqtardy anyqtaıdy ári qajetti kúsh pen tehnıkany aldyn ala bólýge kómektesedi. Osy júıeniń arqasynda órt shyǵý qaýpi bar jerlerdi oqıǵaǵa bir apta qalǵanda anyqtaýǵa bolady.

ıÝmakly jańa tehnologııalar órt sóndirý bólimsheleriniń jumysyn úılestirýge jáne qyzyl jalynmen kúrestiń tıimdiligin arttyrýǵa múmkindik beretinin aıtty.

Túrkııa mınıstri orman órtinen keıingi aýmaqtardy qalpyna keltirý máselesine de toqtaldy. Onyń aıtýyna qaraǵanda, jańa aǵash otyrǵyzý kezinde bılik ár óńirdiń tabıǵı erekshelikterin eskeredi. Máselen, Qara teńiz ben Jerorta teńizi jaǵalaýlaryndaǵy, Egeı óńiri men Ortalyq Anadolydaǵy orman ekojúıeleri bir-birinen aıtarlyqtaı erekshelenedi. Sondyqtan ormandy qalpyna keltirý jumystary jergilikti ósimdikter dúnıesi men ǵylymı zertteýlerge súıene otyryp júrgiziledi.

ıÝmakly tabıǵı tepe-teńdikti jasandy túrde ózgertý áreketterinen saqtandyrdy. Ol Germanııada osyndaı tájirıbe birqatar bıologııalyq máselege ákelip, keıin bul tásilden bas tartýǵa týra kelgenin eske saldy.

Mınıstr ormannyń tabıǵı jolmen qalpyna kelý tetikterine de nazar aýdardy. Atap aıtqanda, qyzyl qaraǵaıdyń búrleri órt kezinde jabylyp, tuqymdaryn saqtap qalady. Al jaǵdaı qolaıly bolǵanda qaıta ashylyp, tuqymdarynyń topyraqqa túsýine múmkindik beredi. ıÝmaklynyń aıtýynsha, orman órtteriniń basym bóligi orman alqaptarynan tys jerlerde bastalady. Sondyqtan órttiń sebepterin anyqtaǵanda ormannyń ózimen qatar, oǵan irgeles aýmaqtardyń jaǵdaıyn da eskerý qajet.

Eske salaıyq, buǵan deıin kúz mezgiline qaramastan, Túrkııada, ásirese Egeı jáne Jerorta teńizi óńirlerinde orman órti qaýpi saqtalyp otyrǵanyn jazǵan edik.