Túrkııa ónerkásibi: kórsetkish sońǵy on jyldaǵy eń tómengi deńgeıge tústi

Túrkııa ónerkásibiniń básekege qabilettilik ındeksi sońǵy on jyldaǵy eń tómengi deńgeıge jetti, dep habarlaıdy Kazinform tilshisi. 

Túrkııa ónerkásipshileri men kásipkerleriniń qaýymdastyǵy (TÜSİAD) júrgizgen sońǵy zertteýge sáıkes, 2025 jyldyń birinshi toqsanynda Túrkııanyń ónerkásip sektorynyń básekege qabilettilik ındeksi jyldyq mánde 8,9%-ǵa tómendep, sońǵy on jyldaǵy eń tómengi deńgeıge jetti.

Jarııalanǵan málimetterge sáıkes, zertteýge qamtylǵan 10 salanyń barlyǵynda básekege qabilettilik sońǵy eki jyl boıy turaqty túrde tómendep keledi.

TÜSİAD sarapshylary bul quldyraýǵa sebep bolyp otyrǵan úsh negizgi faktordy atap ótti:
– aralyq taýarlar baǵasynyń ósýi;
– jumys kúshiniń qymbattaýy;
– qarjylandyrý tartý qunynyń artýy.

Ásirese metallýrgııa, hımııa, toqyma jáne bylǵary ónerkásip salalarynda teris úrdister erekshe baıqalǵan. Bul salalardyń ókilderi shyǵyndardyń ósýi óndiristi jańǵyrtý men eksportty keńeıtý múmkindikterin edáýir shektep otyrǵanyn aıtady.

Sarapshylar jahandyq básekelestik jaǵdaıynda Túrkııa ónerkásibine ishki shyǵyndardy turaqtandyrý men turaqty ósimdi qamtamasyz etýge baǵyttalǵan jedel daǵdarysqa qarsy sharalar qajet ekenin basa aıtady. Usynylyp otyrǵan sheshimder qatarynda:
– memlekettik qoldaýdy keńeıtý,
– salyq saıasatyna reforma engizý,
– tehnologııalyq transformatsııa baǵdarlamalaryn damytý bar.

TÜSİAD eger qazirgi úrdis jalǵasa berse, Túrkııa birqatar halyqaralyq naryqtardaǵy óz pozıtsııasynan aıyrylyp, ónerkásiptik óndiris kóleminiń odan ári qysqarýyna tap bolýy múmkin ekenin eskertti.

Sonymen birge, ótken jyly Túrkııanyń bolat satý kólemi aıtarlyqtaı artqan. Bul jetistik Rýmynııa, Italııa jáne Ispanııa sııaqty elderge eksporttyń joǵary deńgeıimen baılanysty.

Bıylǵy jyldyń basynda Túrkııa qorǵanys jáne aeroǵarysh ónimderin eksporttaýda da eń joǵary ósimdi tirkedi. 

Aıta ketelik Izmır ákimshiliginde sybaılas jemqorlyq isi boıynsha 126 adam qamaýǵa alynǵan edi.