Túrkııa ókili túrki áleminiń yntymaǵy týraly: Tarıhı múmkindik bir ret qana beriledi

ASTANA. KAZINFORM — Túrkııa Uly Ulttyq Májilisiniń tóraǵasy Nýman Kýrtýlmýsh Túrki memleketterdiń Parlamenttik Assambleıasynyń plenarlyq otyrysynda baýyrlas memleketterdiń ókilderin geosaıası ahýal qubylyp turǵan kezeńde tarıh berip otyrǵan múmkindikti birlesip paıdalanýǵa shaqyrdy. 

— Máýerennahrdan Kavkazǵa deıin, Kavkaz aımaǵynan Anadolyǵa deıin, Anadolydan Eýropaǵa deıin sozylyp jatqan ulan-baıtaq terrıtorııada ornalasqan túrki álemine qazirgi jańa kezeń jańa múmkindikter usynyp otyr. Osyny paıdalana bilýimiz kerek. Ózimizge túsken mindetti naqty atqaryp shyǵý — bárimiz úshin paryz. Óıtkeni tarıhı múmkindik bir ret qana beriledi jáne qaıtadan qashan beriletinin eshkim bilmeıdi. Sondyqtan qolymyzǵa túsip turǵan múmkindikti barynsha paıdalanyp qalýymyz kerek. Túrki álemi — 300 mln adamnan turatyn mádenı álem ǵana emes, búkil álemniń eń strategııalyq aımaǵynda ornalasqan, tabıǵı qory mol, baı aýmaq. Sondyqtan álemge jańa órkenıet usynatyndaı áleýeti bar, — dedi ol.

Nýman Kýrtýlmýsh túrki memleketteri táýelsizdigin alǵannan beri qaryshtap damyp kele jatyr dep esepteıtinin aıtty.

— Biraq táýelsizdikti jarııalap qoıý jetkiliksiz. Táýelsizdiktiń qurylymyn nyǵaıtý kerek. Bul — ádebıet pen tarıhty, ǵylym men tehnologııany qamtıtyn búkil saladaǵy táýelsizdikti bildiredi. Azyq-túlik qaýipsizdigi bolsyn, búkil salada táýelsiz bolatyndaı deńgeıge jetýimiz kerek. Olaı bolmasa táýelsizdik qaǵaz júzinde ǵana qalady. Eń basty táýelsizdik — mádenı táýelsizdik. Kúshti memleketterdiń yqpalynan ajyraý — ońaı emes. Oǵan qajetti tarıhı muramyz barshylyq, — dedi Túrkııa Uly Ulttyq Májilisiniń tóraǵasy.

Aıta keteıik, búgingi plenarlyq otyrys qorytyndysy boıynsha TÚRKPA-ǵa tóraǵalyq Ázerbaıjannan Qazaqstanǵa ótip, Astana deklaratsııasy qabyldanady.

Sondaı-aq, búgin Prezıdent Qasym-Jomart Toqaev TúrkPA-ǵa múshe elder parlamentteriniń spıkerlerimen kezdesti.