Túrkııa ókili Mister Global 2026 baıqaýynda jeńimpaz atandy
ASTANA. KAZINFORM — Túrkııalyq Dılhan Dıvrıklı Taılandta ótken Mister Global 2026 halyqaralyq erler sulýlyq baıqaýynda jeńiske jetti, dep habarlaıdy Kazinform agenttiginiń Ankaradaǵy menshikti tilshisi.
Nonthabýrı qalasyndaǵy MCC Hall kórme ortalyǵynda ótken baıqaýdyń fınalynda Dılhan Dıvrıklı Nıgerııa men Fılıppın ókilderimen birge úzdik úshtikke endi.
Baıqaý qorytyndysy boıynsha túrkııalyq qatysýshy bas júldeni ıelendi. Ekinshi oryndy nıgerııalyq Betel Mbamara, úshinshi oryndy fılıppındik Em Djeı Ordılıano aldy.
Baıqaýǵa álemniń túrli elderinen kelgen úmitkerler qatysty. Shamamen on kún boıy qatysýshylar daıyndyq kezeńinen ótip, túrli is-sharalar men tanystyrylymdarǵa qatysty. Fınalda olar qazylar alqasynyń aldynda óner kórsetti.
Dılhan Dıvrıklı buǵan deıin Túrkııada ótken modeldik baıqaýlarda da jetistikke jetken. Onyń otbasy Afonkarahısar provıntsııasynan shyqqanymen, ózi Belgııada turady. Dılhan tórt tilde sóıleıdi. Modeldik mansabynan bólek, akterlik ónerge qyzyǵýshylyq tanytyp, osy baǵytta damýdy josparlap otyr.
Buǵan deıin jeti jyl boıy sán áleminde júrgen Shyńǵys Tanatpaev búginde Ulttyq ulan sapynda áskerı boryshyn ótep júrgenin jazǵanbyz. Jaqynda jas jigit jaıly aqparat áleýmettik jelilerde jarysa jarııalanǵan edi. Alaıda onyń kópshilik bile bermeıtin qyrlary jeterlik. Ol — karateden birneshe dúrkin el chempıony, tórt til meńgergen polıglot. Osy tusta Kazinform tilshisi Shyńǵys Tanatpaevpen suhbattasyp, onyń modeldik joly men tabysy jaıly surap bildi.
