Túrkııa Netanıahýdyń málimdemelerine qatań jaýap qatty
ASTANA. KAZINFORM — Ankara Izraıl premer-mınıstriniń Túrkııanyń aımaqtaǵy róli týraly aıtqan sózderin joqqa shyǵaryp, olardy burynnan kele jatqan rıtorıkanyń bir bóligi ári Izraıl basshylyǵynyń óz qadamdarynan nazardy basqa jaqqa aýdarý amaly dep atady, dep habarlaıdy Kazinform menshikti tilshisi.
Túrkııa prezıdentiniń resmı ókili, Memleket basshysy ákimshiliginiń kommýnıkatsııalar jónindegi dırektory Býrhanettın Dýran Izraıl premer-mınıstri Bınıamın Netanıahýdyń Ankaranyń «ımperııany qalpyna keltirýge umtylyp otyr» degen ısharasyna qatań syn aıtty.
— Aımaqtaǵy ózge elderdiń «ımperıalıstik ambıtsııalary» týraly ızraıldik basshylardyń paıymdaýlaryn qazirgi zaman tarıhyndaǵy eń aýyr qylmystardyń birin jasaǵannan keıin estý — ıronııaly jaǵdaı, — dep jazdy Dýran X áleýmettik jelisinde.
It is ironic for Israeli leaders to speak about imperialistic ambitions of others in this region while they have just committed one of the worst genocides in history. Israel has been a destabilizing force and their long-standing hysteria about Türkiye’s power and influence is…
— Burhanettin Duran (@burhanduran) December 23, 2025
Ol Túrkııanyń yqpaly men róline qatysty Izraıldiń kópten bergi úreıi kúlkili kórinetinin de atap ótti.
Sondaı-aq Túrkııa ókili Izraıldi ulttyq qaýipsizdik múddelerin alǵa tarta otyryp, aýmaqtyq maqsattaryn búrkemeleýge tyrysyp otyr dep aıyptady. Ol Izraıl kúshteriniń Palestına men Sırııa aýmaqtarynda áli de qalýy osynyń dáleli ekenin aıtty.
— Izraıl premer-mınıstriniń eshqandaı arzan shabýyldary men qısynsyz málimdemeleri bizdi palestınalyq baýyrlarymyz ben ápke-qaryndastarymyzdy qoldaýdan bas tartqyza almaıdy, — dep málimdedi ol.
Ankaranyń mundaı qatań reaktsııasy Netanıahýdyń Izraıl, Grekııa jáne Kıpr arasyndaǵy úshjaqty sammıt barysynda jasaǵan málimdemelerinen keıin týyndady. Buǵan deıin Izraıl bıligi Bashar Asad rejımi qulaǵannan keıin Sırııada Túrkııanyń yqpaly kúsheıýi múmkin ekenine alańdaýshylyq bildirip, sondaı-aq Gazada ornalastyrylýy josparlanǵan halyqaralyq turaqtandyrý kúshterine Ankaranyń qatysýyna qarsy shyqqan bolatyn.