Túrkııa múgedek jandardyń ǵıbadatyna tolyq jaǵdaı jasaýdy qolǵa alyp otyr
ASTANA. 3 qazan. QazAqparat - Qazannyń 1-inen bastap Túrkııanyń Ankara qalasyndaǵy Qojatepe meshitiniń aýlasynda Meshit aptalyǵy bastaldy. Bul mereke jeti kúnge sozylmaq.
Atalmysh sharany Túrkııanyń Din isteri jónindegi mınıstrligi uıymdastyryp otyr, dep jazady muslim.kz saıty.
Áziret Sultan meshiti resmı saıtynyń jazýyna qaraǵanda, ótken jyly mınıstrlik «Balalardy meshitpen tanystyrý» baǵdarlamasyn qolǵa alsa, bıyl - «Mináját etýge meshit esigi kimge de bolsyn ashyq» jobasy aıasynda múgedek, kemtar jandardyń meshitke kelýine jaǵdaı jasap otyr.
Osy aptanyń ishinde joǵarydaǵy joba sheńberinde mınıstrlik birqatar sharalar uıymdastyrýdy josparlaıdy. «Mináját etýge meshit esigi kimge de bolsyn ashyq» baǵdarlamasy qoǵam nazaryn múmkindigi shekteýli jandarǵa aýdarý maqsatynda uıymdastyrylýda.
«Din isteri jónindegi mınıstrlik meshitke kelgen múgedek, kemtar jandardyń esh qysylyp-qymtyrylmaýy úshin, namaz oqýǵa yńǵaıly bolatyn barlyq jaǵdaı jasaýdy kózdep otyr. Bul baǵytta birshama sharalar da atqarylǵan. Túrkııanyń ár oblysynda múmkindigi shekteýli jandarǵa, ásirese, tirek-qımyl apparattary buzylǵan adamdar úshin kem degende bir meshit bolmaq. Túrkııanyń ár oblysyndaǵy múftııattar kemtar jandarǵa akkýmýlıatory bar múgedekterge arnalǵan arbalar alatyn bolady», - dep jazady resmı saıt.
