Túrkııa men Sırııadaǵy jer silkinisi saldarynan 850 myńnan astam bala úısiz qaldy

ASTANA. QazAqparat - Túrkııa men Sırııanyń ońtústiginde bolǵan joıqyn eki jer silkinisinen keıin bir aı ótkende 850 myńnan astam bala turaqty baspanasyz qaldy, dep habarlaıdy QazAqparat BUU jańalyqtar ortalyǵyna silteme jasap.

ıÝNISEF balalar qory jer silkinisiniń saldary aımaqtaǵy balalar men otbasylar úshin apatty jaǵdaıǵa aınalǵanyn atap ótedi. Júzdegen myń adam sharasyz jaǵdaıda qaldy. Kóptegen otbasylar ýaqytsha baspanalarda turady.

Túrkııanyń ózinde ǵana zardap shekken aýdandarda 1,9 mln-nan astam adam tıisti sanıtarlyq jaǵdaı, sýmen qamtamasyz etý jáne medıtsınalyq kómekke qoljetimdilik joq ártúrli baspanalarǵa ornalastyrylǵan. Elde 2,5 mln bala shuǵyl gýmanıtarlyq kómekke muqtaj.

«Zilzala saldarynan úılerin tastap ketýge májbúr bolǵan otbasylar tórt apta boıy aman qalýǵa tyrysty. Jerasty dúmpýleri jalǵasyp jatqandyqtan, olar ábden qorqyp qalǵan», - dedi ıÝNISEF-tiń Eýropa jáne Ortalyq Azııa boıynsha aımaqtyq dırektory Afshan Han.

Aldyn ala málimet boıynsha, jer silkinisi saldarynan Sırııada 500 myńnan astam adam úılerin tastap ketýge májbúr boldy. Kóptegen úıler qırap qaldy. Sonymen qatar, jer silkinisi jalǵasyp jatqandyqtan, úıleri aman qalǵan balalary bar otbasylar úılerine qaıtýǵa qorqady. Sırııada jer silkinisinen 3,7 mln-nan astam bala zardap shekti.

6 aqpanda epıtsentri Kahramanmarashta magnıtýdasy jeti baldan asatyn eki jer silkinisi boldy. Júzdegen aftershokqa ulasqan eerasty dúmpýleri eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.

Túrkııada jer silkinisi qurbandarynyń sany 46 myńnan asty.