Túrkııa men Sırııa saýda qatynastaryn damytatyn jol kartasyn iske asyrýǵa kiristi

ASTANA. KAZINFORM – Túrkııa men Sırııa eki el arasyndaǵy ekonomıkalyq baılanysty qalpyna keltirýge baǵyttalǵan mańyzdy qadamdardy qamtıtyn saýda qatynastarynyń jol kartasyn júzege asyrýǵa kiristi.

Túrkııanyń Saýda mınıstrligi Omer Bolattyń málimdemesine sáıkes, kedendik baj salyǵyn tómendetý jáne erkin saýda kelisimin qalpyna keltirý máselelerine erekshe nazar aýdaryldy.

2024 jyly 8 jeltoqsanda Sırııadaǵy burynǵy rejım qulaǵannan keıin Ankara men Damask belsendi dıalogqa kóshti, nátıjesinde ekonomıkalyq baılanystar aıtarlyqtaı nyǵaıa tústi. Túrik tarapynyń málimdemesinde aıtylǵandaı, yntymaqtastyqtyń jańa kezeńi eleýli ózgerister ákeledi.

- Endi túrik taýarlary Sırııanyń soltústigindegi buryn bitimgershilik operatsııalary kezinde azat etilgen aımaqtarǵa ǵana emes, sonymen birge eldiń búkil aýmaǵyna tasymaldana alady, - delingen qujatta.

Túrkııa Sırııanyń eń iri saýda seriktesi bolyp qala bere otyryp, kóp jylǵy qaqtyǵystardan qıraǵan Sırııa ekonomıkasyn qalpyna keltirýge qatysýǵa nıetti. Negizgi kúsh ınfraqurylymdy damytýǵa, kólik dálizderin qalpyna keltirýge jáne logıstıkany jeńildetýge baǵyttalady. 

Elder arasyndaǵy ekonomıkalyq qarym-qatynastyń jandanýy aımaqtaǵy turaqtylyqty nyǵaıtý jáne kóptegen salalardaǵy ekijaqty yntymaqtastyqty qalpyna keltirýde shapshańdatqysh bolady dep kútilip otyr. 

Buǵan deıin Sırııa túrik taýarlaryna kedendik baj salyǵyn kúrt arttyrǵanyn jazǵan bolatynbyz. 

Jańa sharalar is júzinde elder arasyndaǵy saýdany irkiltti, bul túrik eksporttaýshylaryn kúrdeli máselelerge ákep soqtyrdy.