Túrkııa men Sırııa áskerı yntymaqtastyq týraly memorandýmǵa qol qoıdy

ASTANA. KAZINFORM – Túrkııa men Sırııa ekijaqty qatynastardy, sonyń ishinde áskerı saladaǵy baılanystardy qalypqa keltirý baǵytynda mańyzdy qadam jasady, dep habarlaıdy Kazinform agenttiginiń menshikti tilshisi.

Eki eldiń qorǵanys mınıstrleri áskerı yntymaqtastyq salasyndaǵy ózara túsinistik týraly memorandýmǵa qol qoıdy. Qujat birlesken oqytýdy, tájirıbe almasýdy jáne qorǵanys salasynda keńes berýdi kózdeıdi.

Túrkııanyń Ulttyq qorǵanys mınıstrliginiń resmı málimdemesinde aıtylǵandaı, mınıstr ıAshar Gúler Sırııanyń qorǵanys mınıstri Mýrhıf Abý Kasramen, sondaı-aq Sırııanyń syrtqy ister mınıstri Asad Hasan Shaıbanı jáne barlaý qyzmetiniń dırektory Hýseın as-Salamamen kezdesti.

Kelissózder barysynda ekijaqty jáne óńirlik qaýipsizdiktiń negizgi máseleleri, sonyń ishinde shekaradaǵy turaqtylyqty nyǵaıtý sharalary talqylandy.

Qol qoıylǵan memorandým Ankara men Damask arasyndaǵy ózara is-qımyldyń jańa kezeńin bildiredi. Sońǵy jyldary bul eki el aımaqtaǵy saıası jáne áskerı qaqtyǵystarda qarama-qarsy taraptarda bolǵan edi. Jetken ýaǵdalastyqtar aıasynda birlesken áskerı jattyǵýlar ótkizý, oqytý úshin ofıtserler almasý, sondaı-aq transshekaralyq qaýip-qaterler men terrorızmge qarsy is-qımyl máseleleri boıynsha dıalogty damytý josparlanyp otyr.

Sarapshylar kelisimge qol qoıýdy eki eldiń jaqyndasýy men Taıaý Shyǵystaǵy shıelenisti azaıtý jolyndaǵy mańyzdy qadam dep baǵalaıdy. Taraptar aımaqtaǵy turaqtylyq pen beıbitshilikti qamtamasyz etý múddesinde yntymaqtastyqty keńeıtýge daıyn ekenderin bildirdi.

Buǵan deıin habarlanǵandaı, bıyl tamyz aıynyń sońyna deıin Ankara men Damask áskerı yntymaqtastyq týraly aýqymdy kelisimge qol qoıýdy josparlap otyr.

Aıta ketelik Erdogan generaldar men admıraldardy taǵaıyndady.