Túrkııa men Reseıdiń iri kásiporyndary Aqtóbe kásipkerlerimen baılanys ornatýǵa keldi
AQTÓBE. QazAqparat - Aqtóbede «MinTech-AqtóbeMunaıHım - 2018» halyqaralyq kórmesi ótip jatyr. Bıyl alǵash ret Túrkııa, Reseı, Ýkraınanyń jańa iri óndiris oryndary qatysty, dep habarlaıdy QazAqparat tilshisi.
Aqtóbe qalasynda taý-ken, hımııa, metallýrgııa, energetıka salasyndaǵy iri óndiris oryndarynyń kórmesi ótip jatyr. Eki kúnge josparlanǵan kórmege Qazaqstan, Reseı, Túrkııa, Ýkraına, Germanııa, Shveıtsarııa elderinen iri óndiris oryndary taýarlary men qyzmetin usyndy. Qazaqstanǵa alǵash ret kelgen Túrkııanyń «Asos Proses Makina San.ve Tic.A.S» kompanııasy hımııa, taý-ken salasyna qajetti iri zaýyttardy salýdy josparlap otyr.
«Qazaqstanǵa, Aqtóbege alǵash ret kelip turmyz. Biz naryqty zerttep, usynystardy qabyldaýǵa keldik. Hımııa, taý-ken salasyna qajetti zaýyttardy salyp, ınvestorǵa kiltti usynamyz. Sonymen qatar, kómir keptiretin apparat shyǵaramyz. Injenerlik saraptama, jobalaý, qurylys, iske qosýdy, mamandardy oqytýdy kompanııa ózi júrgizedi. Biraq kompanııa ınvestıtsııa salmaıdy. Aqtóbege tanysý úshin keldik. Qazaqstanda birde-bir jobamyz joq. Kóbine Eýropa elderi men Reseı, Túrkııada óndiris oryndaryn iske qostyq», - dedi kompanııanyń satý jónindegi ınjeneri Valentına Shevchenko.
QR Úkimetiniń, Aqtóbe oblysy ákimdiginiń jáne «Qazhrom» TUK» AQ-nyń qoldaýymen ótkizilip jatqan kórmege Aqtóbeniń mys, taý-ken, hımııa zaýyttary qatysty.
«Kórme ár eldiń kásipkerlerin baılanystyryp, jańa seriktes tabýǵa kómektesedi. Alǵash qatysqandar seriktes tapsa, keler jyly taǵy qatysady. Al baılanys ornatyp, jobasy iske aspaǵandary basqa baǵytty tańdaıdy. Kórme seriktesti shetelge baryp izdemeı, osynda tanysyp, baılanys ornatýǵa múmkindik beredi. Básekelestik joǵary, keıbir kompanııa Qazaqstan naryǵyna kirý jolyn bilmeıdi», - dedi «QAZEKSPO» halyqaralyq kórme kompanııasynyń dırektory Rımma Ǵalymjanova.
Aqtóbege hımııa zaýyttaryna, mekteptegi hımııa kabınetteri men aýyl sharýashylyǵyna qajetti prıborlar shyǵaratyn Reseıdiń «PraımKemıkalsGrýpp» kompanııasy da alǵash ret qatysty.
«Hımııalyq qural-jabdyqtardy Chehııa zaýyttarymen birge shyǵaramyz. Laboratorııaǵa qajetti prıborlardy mektepte, zaýytta, fermalarda qoldanýǵa bolady. Qazaqstanda seriktesimiz joq, biraq kórmeden seriktes tabamyz dep úmittenip otyrmyz. Qazaqstan naryǵy biz úshin mańyzdy», - dedi kompanııanyń satý jónindegi jetekshisi Tatıana Denışenko. 
