Túrkııa men Pákistan Tramptyń Gazadaǵy beıbitshilik josparyn qoldady

ASTANA. KAZINFORM — Birqatar musylman elderi AQSh prezıdentiniń Gaza sektoryndaǵy jaǵdaıdy retteý josparyn quptady, dep habarlaıdy Report.

Túrkııa, Pákistan, Egıpet, Iordanııa, Indonezııa, Katar, Birikken Arab Ámirlikteri jáne Saýd Arabııasy sııaqty birqatar musylman eli AQSh prezıdenti Donald Tramptyń Gaza sektoryndaǵy jaǵdaıdy retteý josparyn quptap, ony júzege asyrý úshin Vashıngtonmen yntymaqtasýǵa daıyn ekendikterin bildirdi.

Bul týraly Pákistan Syrtqy ister mınıstrligi málimdegen. 

— Iordanııa Hashımıt Koroldigi, Birikken Arab Ámirlikteri, Indonezııa Respýblıkasy, Pákistan Islam Respýblıkasy, Túrkııa Respýblıkasy, Saýd Arabııasy Koroldigi, Katar memleketi jáne Egıpet Arab Respýblıkasynyń Syrtqy ister mınıstrleri prezıdent Donald Tramptyń basshylyǵyn jáne onyń Gazadaǵy soǵysty toqtatýǵa baǵyttalǵan shynaıy kúsh-jigerin quptaıdy. Onyń beıbitshilikke jol taba alatynyna senim bildiredi, — delingen qujatta.

Osyǵan baılanysty Syrtqy ister mınıstrleri Tramptyń soǵysty toqtatý, Gazany qaıta qurý, Palestına halqynyń qonys aýdarýyna jol bermeý, jan-jaqty beıbitshilikti ilgeriletý jáne Iordan ózeniniń batys jaǵalaýynyń anneksııalanýyn boldyrmaý týraly málimdemelerin quptaıdy.

— Mınıstrler kelisimdi aıaqtaý jáne aımaq halqy úshin beıbitshilik, qaýipsizdik jáne turaqtylyqty qamtamasyz etetindeı onyń oryndalýyn qamtamasyz etý úshin Amerıka Qurama Shtattarymen jáne taraptarmen oń jáne konstrýktıvti qarym-qatynas ornatýǵa daıyn ekendigin rastaıdy, — delingen birlesken málimdemede.

Buǵan deıin Aq úı Tramptyń Gazadaǵy jaǵdaıdy retteýge arnalǵan josparyn jarııa etti.