Túrkııa men Mysyrdyń qorǵanys salasyndaǵy áriptestigine Grekııa alańdaı bastady
ASTANA. KAZINFORM – Túrkııa men Mysyrdyń qorǵanys salasyndaǵy sońǵy ýaqyttaǵy jaqyndaı túsýi Grekııada alańdaýshylyq týǵyzyp otyr. Bul týraly grektiń Kathimerini gazeti jazdy, dep habarlaıdy Anadolý.
«Túrkııa men Mysyr qorǵanys salasynda jaqyndasyp keledi» atty maqalada 13 shildede Túrkııa Prezıdenti Ákimshiliginiń Qorǵanys ónerkásibi basqarmasynyń basshysy Halýk Górgúnniń Mysyrdyń qorǵanys jáne áskerı óndiris mınıstri, general-leıtenant Eshref Salım Zahırmen kezdeskeni aıtylǵan.
Basylymnyń habarlaýynsha, kezdesý barysynda eki el qorǵanys ónerkásibi salasyndaǵy yntymaqtastyqtyń negizgi baǵyttaryn aıqyndaıtyn nıet týraly hatqa qol qoıǵan.
Sondaı-aq maqalada Eshref Zahırdiń Túrkııadaǵy qorǵanys ónerkásibi kásiporyndarymen kezdesýlerine nazar aýdarylyp, Mysyrdyń túrik qorǵanys ónerkásibiniń eń kóp eksporttalatyn ónimderiniń biri sanalatyn ushqyshsyz ushý apparattaryn óndiretin óńirlik ortalyqqa aınalýǵa umtylyp otyrǵany atap ótilgen.
Basylym avtorlarynyń pikirinshe, Túrkııa men Mysyr áýe, teńiz jáne qurlyq áskerleriniń birlesken oqý-jattyǵýlaryn ótkizip keledi. Sonymen qatar Mysyrda Túrkııa, Saýd Arabııasy jáne Pákistannyń qatysýymen ótken tórtjaqty kezdesýdiń mańyzy erekshe bolǵany aıtylǵan.
Maqalada osy kezdesýde Túrkııa men Mysyr Lıvııa máselesine qatysty kóptegen baǵyt boıynsha ortaq ustanymǵa kelgeni kórsetilgen.
– Túrkııa men Mysyrdyń jaqyndasýy ázirge Grekııanyń múddelerine tikeleı qaýip tóndirmeıdi. Degenmen bul óńirdegi geosaıası tepe-teńdiktiń ózgerýine baılanysty alańdaýshylyqty kúsheıtetin faktor bolyp otyr, – dep jazady Kathimerini gazeti.
Aıta keteıik, buǵan deıin Frantsııa men Italııa qorǵanys salasyndaǵy strategııalyq áriptestikti nyǵaıtyp jatqanyn jazdyq.
Sondaı-aq Japonııa qarý eksporty saıasatyn ózgertip, Fılıppınge bet burdy.
Al Eýroodaq 600 000 qyzmetkerin qorǵanys baǵytynda qaıta daıarlaýdy josparlap otyrǵanyn jazdyq.
