Túrkııa men Lıvııa ózara saýda kólemin jylyna $10 deıin jetkizýdi josparlap otyr

ASTANA. KAZINFORM – Taraptar túrkııalyq ónerkásip jáne kommertsııalyq taýarlardy tasymaldaý úshin erkin saýda aımaǵyn qurýǵa kelisti, dep habarlaıdy Anadoly.

Lıvııanyń ekonomıka jáne saýda mınıstri Mohammed Hýveıdj Túrkııanyń saýda mınıstri Omer Bolatpen Trıpolıde bolǵan kelissózderden soń eki el arasyndaǵy ózara saýda kólemin 10 mıllıard dollarǵa jetkizýdi josparlap otyrǵanyn atap ótti.

- Kezdesý qorytyndysy boıynsha biz osyǵan deıin jasalǵan ózara túsinistik týraly memorandýmdar men kelisimderdi halyqaralyq ekonomıkalyq oqıǵalarǵa baılanysty qaıta qaraý qajet dep sheshtik, - dedi Hýveıdj.

Onyń sózinshe, túrkııalyq mınıstrmen kezdesý Túrkııa men Lıvııa arasyndaǵy uzaqmerzimdi yntymaqtastyqtyń jańa úlgisin jasaýǵa arnaldy.

Hýveıdj, Bolat pen Lıvııanyń Ortalyq bankiniń basshysy úshjaqty kezdesý ótkizip, Ankara men Trıpolı arasyndaǵy ekonomıkalyq baılanystardyń damý barysyn sóz etti.

Kelissózderdiń qorytyndysy boıynsha, taraptar eski jobalardy jańǵyrtyp, túrkııalyq kompanııalardyń óz bıznesine oralýy, banktik kepildik problemalaryn sheshý sııaqty máseleler boıynsha kelisimge keldi.

- Osy baǵytta túrkııalyq jáne lıvııalyq kompanııalar betpe-bet kelip júrgen problemalardy baqylaý men seriktestikke qol jetkizý máselelerin qadaǵalap otyratyn birlesken ekonomıkalyq komıtet qurdyq, - dedi Lıvııa mınıstri.

Qazirgi tańda eki el arasyndaǵy saýda kólemi 3,7 mlrd dollarǵa jetti.

Osyǵan deıin Qazaqstan Parlamenti Májilisiniń tóraǵasy Erlan Qoshanov Túrkııamen parlamentaralyq seriktestikti odan ári nyǵaıtýǵa múddeli ekenimiz týraly aıtqan edi.