Túrkııa men Koreıa energetıka jáne qorǵanys salasyndaǵy yntymaqtastyqty keńeıtedi
ASTANA. KAZINFORM — Ankara men Seýl strategııalyq mańyzy bar salalardaǵy áriptestikti nyǵaıtýǵa kelisti. Negizgi baǵyttardyń biri Túrkııanyń Sınop qalasynda josparlanyp otyrǵan atom elektr stantsııasynyń (AES) qurylysyn qarjylandyrý bolmaq, dep habarlaıdy Kazinform agenttiginiń Ankaradaǵy menshikti tilshisi.
Seýlde Túrkııa Prezıdenti Rejep Taııp Erdoǵan men Ońtústik Koreıa Prezıdenti Lı Chje Men kezdesti. Taraptar atom energetıkasy, qorǵanys ónerkásibi, ınfraqurylym, joǵary tehnologııalar jáne saýda salalaryndaǵy yntymaqtastyqty talqylady.
Kelissóz qorytyndysy boıynsha energetıka, taý-ken ónerkásibi jáne atom jobalaryn qarjylandyrýǵa qatysty úsh qujatqa qol qoıyldy.
Sınoptaǵy AES qurylysyn qarjylandyrý
Kezdesýdiń negizgi nátıjeleriniń biri — Túrkııanyń Atom energetıkasy kompanııasy (TÜNAŞ) men Koreıanyń Eksport-ımport banki (KEXIM) arasynda memorandýmǵa qol qoıylýy. Kelisim birlesken qarjylandyrý úlgilerin ázirleýdi jáne Ońtústik Koreıa kompanııalarynyń Túrkııadaǵy atom jobalaryna qatysýyna jaǵdaı jasaýdy kózdeıdi.
Negizgi nazar Qara teńiz jaǵalaýyndaǵy Sınop qalasynda AES salý jobasyna aýdaryldy. Joba tórt reaktor salýdy qarastyrady. Bul stantsııa Túrkııadaǵy ekinshi atom elektr stantsııasy bolmaq. Ońtústik Koreıa jobaǵa qatysýy múmkin elderdiń qatarynda.
2025 jyly TÜNAŞ pen Ońtústik Koreıanyń KEPCO kompanııasy joba boıynsha aldyn ala tehnıkalyq-ekonomıkalyq zertteýlerdi bastaǵan bolatyn. Endi taraptar qarjylandyrý nusqalaryn zerdeleý úshin jumys tobyn qurýdy josparlap otyr.
Sonymen birge qurylys boıynsha merdiger men seriktesterdiń túpkilikti quramy áli anyqtalǵan joq. Jobanyń quny, ınvestıtsııa tartý tetigi, tehnologııalardy berý sharttary jáne bolashaqta óndiriletin elektr energııasynyń baǵasy da ázirge belgisiz.
Qorǵanys ónerkásibi men tehnologııalar
Erdoǵan men Lı qorǵanys salasyndaǵy yntymaqtastyqty keńeıtýge de ýaǵdalasty. Túrkııa Prezıdenti «Fırtına» ózdiginen júretin artıllerııalyq qondyrǵylary men «Altay» tankterin birlesip óndirý jobalarynyń áleýetin atap ótti.
Taraptar qarý-jaraqty birlesip óndirýdi, tehnologııa almasýdy jáne úshinshi elderdiń naryqtaryna shyǵýdy kózdep otyr. Áskerı keme jasaý máselesi de talqylandy. 2026 jylǵy qyrkúıekte eki el teńiz salasyndaǵy yntymaqtastyq jónindegi nıet hatyna qol qoıǵan bolatyn.
Taǵy bir memorandým atom jáne jańartylatyn energetıka, sýtegi tehnologııalary, energııa tıimdiligi men aqyldy elektr jelileri salalaryndaǵy áriptestikti qamtıdy.
Birlesken jobalardy damytý úshin Túrkııa-Koreıa energetıkalyq transformatsııa forýmy qurylady. Ony jyl saıyn eki el kezekpen ótkizýdi josparlap otyr.
Taǵy bir kelisim mańyzdy paıdaly qazbalar men sırek jer elementterin óndirý jáne óńdeý salasyndaǵy yntymaqtastyqty damytýǵa baǵyttalǵan.
Eske salaıyq, buǵan deıin Túrkııadaǵy AES alǵashqy elektr energııasyn óndirýge daıyndalyp jatqanyn jazǵan edik.
