Túrkııa men Qyrǵyzstanǵa júk tasymaldaý blankteri elektrondy formatqa aýystyrylady
ASTANA. KAZINFORM — Kólik mınıstri Nurlan Saýranbaev Úkimet otyrysynda Qazaqstan e-CMR konventsııasyna qosylatynyn aıtty.
— Avtokólik arqyly júk tasymaldaý kólemi 288 mln tonna bolyp, byltyrǵydan 1,7 paıyz ósti. Avtomattandyrylǵan ólsheý stantsııalary bıýdjetke túsetin salym deńgeıin 10 esege arttyrdy. Avtokólikpen júk tasymaldaý 42 elmen júzege asyrylady. Byltyr Qytaı jáne Ózbekstan elderimen qaǵaz túrindegi sheteldik ruqsat blankteri elektrondyq formatqa aýystyryldy. Búginde Ázerbaıjan júıesimen ıntegratsııalaý boıynsha tehnıkalyq jumystar júrgizilip jatyr. Aldaǵy kezeńde Túrkııa jáne Qyrǵyzstan elderimen tıisti jumystardy júzege asyrý josparlanǵan, — dedi Nurlan Saýranbaev.
Vedomstvo basshysy Qazaqstan avtokólikpen júk tasymaldaýda básekege qabiletti bolý úshin ilespe qujattardy tsıfrlandyra beretinin aıtty.
— El ishinde tasymaldaýǵa qatysty júıe engizildi. Onyń zańnamalyq talaptary kelesi jyldan bastap kúshine enedi. Halyqaralyq tasymaldaýda e-CMR (halyqaralyq elektrondy taýar-kólik júk qujattaryn) qoldaný úshin Halyqaralyq konventsııaǵa qosylý máselesi pysyqtalyp jatyr. Odan keıin kórshi eldermen Ulttyq shlıýz arqyly ıntegratsııalyq jumystar bastaýdy josparlanǵan, — dedi mınıstr.
Buǵan deıin 2026 jyly elimizde pılotsyz taksı qyzmeti iske qosylatynyn jazǵan edik.