Túrkııa men Qazaqstannyń ınjenerlik qaýymdastyqtary yntymaqtastyqty damytýǵa múddeli

ASTANA. KAZINFORM — Túrkııa men Qazaqstannyń ınjenerlik qaýymdastyqtary arasyndaǵy baılanysty nyǵaıtyp, jas mamandardy salaǵa tartý kózdelip otyr. Bul týraly ASHRAE uıymynyń Túrkııadaǵy bólimshesiniń múshesi, ASHRAE Turkish Chapter basqarmasynyń 2026–2027 jyldardaǵy hatshysy Hande Akten Chel Astanada ótken halyqaralyq konferentsııada aıtty.

Túrkııa men Qazaqstannyń ınjenerlik qaýymdastyqtary yntymaqtastyqty damytýǵa múddeli
Foto: Kazinform

Hande Akten Chel kásibı ınjenerlik qaýymdastyqty qalyptastyrýdaǵy Túrkııa tájirıbesimen bólisti. Onyń aıtýynsha, Túrkııada ASHRAE tehnıkalyq mamandardyń halyqaralyq kásibı ortamen baılanys ornatýyna múmkindik berip otyr.

— Túrkııada ASHRAE tehnıkalyq qaýymdastyq pen halyqaralyq kásibı jeli arasyndaǵy baılanysty jaqsy jolǵa qoıǵan. Qazaqstanda da stýdentter, ınjenerlik qaýymdastyq pen óndiris ókilderi arasynda osyndaı tıimdi yntymaqtastyq ornatýdy maqsat etip otyrmyz, — dedi Hande Akten.

Onyń sózinshe, ASHRAE jylytý, jeldetý jáne aýany baptaý salasyndaǵy mamandardyń halyqaralyq tájirıbe almasýyna jaǵdaı jasaıdy. Uıym úshin memlekettik qurylymdarmen baılanys ornatý da mańyzdy.

Budan bólek, ol Qazaqstandaǵy derekter ortalyqtary naryǵynyń damý múmkindigine de toqtaldy. Ol elimizdiń bul salany damytýǵa daıyn ekenin aıtyp, eń aldymen jastardy ınjenerlik mamandyqtarǵa tartý qajettigin atap ótti.

— Meniń oıymsha, Qazaqstan buǵan daıyn. Eń mańyzdysy — stýdenttermen belsendi jumys isteý. Biz jastardy osy salaǵa kóbirek tartqymyz keledi. Ol úshin túrli tehnıkalyq konferentsııalar ótkizemiz. Máselen, kelesi jyldyń sáýirinde osyndaı aýqymdy konferentsııa uıymdastyrý josparlanyp otyr. Bul qazaqstandyq mamandardyń kásibı damýyna da yqpal etedi, — dedi ol.

Hande Akten Chel ASHRAE qaýymdastyǵynda tájirıbeli oqytýshylar men sarapshylar bar ekenin, olardyń qazaqstandyq áriptesterine kásibı qoldaý kórsetýge daıyn ekenin jetkizdi.

Konferentsııa barysynda derekter ortalyqtaryn salqyndatý máselesine de nazar aýdaryldy. Mamandardyń aıtýynsha, jasandy ıntellekt, tsıfrlyq ekonomıka men bultty tehnologııalardyń qarqyndy damýy derekter ortalyqtarynyń kóbeıýine yqpal etip otyr. Al olardyń úzdiksiz jumys isteýi úshin senimdi ınjenerlik ınfraqurylym, ásirese tıimdi salqyndatý júıeleri qajet.