Túrkııa men Izraıl Sırııadaǵy qaqtyǵystardyń aldyn alý boıynsha keńesýlerdi bastady
ASTANA. KAZINFORM – Kóp jylǵy úzilisten keıin Túrkııa men Izraıl Sırııada múmkin bolatyn shıelenistiń aldyn alý maqsatynda tehnıkalyq keńesýler ótkizdi, dep habarlaıdy Kazinform agenttiginiń menshikti tilshisi.
Kelissózder keshe Ázerbaıjanda ótti jáne Sırııa aýmaǵynda áreket etetin eki eldiń qarýly kúshteri arasyndaǵy janjaldyń aldyn alý tetikterin ázirleýge arnaldy.
Taraptar Túrik jáne Izraıl áskerı qyzmetkerleri arasynda kezdeısoq nemese qasaqana ıntsıdentterdiń aldyn alý joldaryn talqylady. Bul alǵashqy kezdesý tehnıkalyq deńgeıde ótti, joǵary laýazymdy saıasatkerler qatysqan joq. Degenmen basty maqsat aıqyn boldy – tikeleı qaqtyǵys qaýpin azaıtý.
Túrkııanyń syrtqy ister mınıstri Hakan Fıdan Ankaranyń Izraılmen AQSh jáne Reseımen bar ózara is-qımyl tetikterine uqsas úılestirý júıesin qurýǵa múddeli ekenin aıtty. Ol bul qadam Túrkııanyń Sırııanyń soltústigindegi áskerı kontıngentiniń qaýipsizdigin qamtamasyz etý úshin qajet ekenin atap ótti.
Sonymen qatar, Fıdan Túrkııa men Izraıl arasyndaǵy qarym-qatynastardy tolyq qalypqa keltirý protsesiniń bastalý múmkindigin múldem joqqa shyǵardy. Ol munyń basty sebebi retinde Izraıldiń Gazadaǵy áskerı operatsııasyn atady. Túrkııalyq mınıstrdiń aıtýynsha, bul áreketter ekijaqty saıası qatynastardy jaqsartý úshin eshqandaı alǵyshart qaldyrmaıdy.
Túrkııa sonymen qatar Izraılden Sırııa aýmaǵyna jasalyp jatqan soqqylardy dereý toqtatýdy talap etti. Ankara Izraıl Túrkııa áskerı bazalaryn ornalastyrýy múmkin nysandarǵa soqqy jasap jatyr degen málimetterge alańdaýshylyq bildirdi. Al Izraıl óz kezeginde Sırııanyń ońtústiginde áskerı qatysýyn jalǵastyryp otyr.
Túrik sholýshylarynyń aıtýynsha, Ázerbaıjanda ótken keńesýler eki el arasyndaǵy tehnıkalyq úılestirý jolyndaǵy alǵashqy qadam boldy. Alaıda saıası deńgeıde jaqyndasý múmkindigi áli de buldyr kúıde qalyp otyr.
Buǵan deıin Túrkııa Izraılmen saýda-ekonomıkalyq qatynastardy toqtatýdyń ekinshi kezeńin bastaǵanyn habarlaǵan bolatynbyz. Keıin Túrkııa prezıdenti janyndaǵy Dezınformatsııamen kúres ortalyǵy Túrkııa men Izraıl arasyndaǵy saýda áli de jalǵasyp jatyr degen málimetterdi resmı túrde joqqa shyǵardy.
Buǵan deıin habarlanǵandaı, Ystanbulda AQSh-Reseı konsýltatsııalary ótip jatyr.