Túrkııa men Ázerbaıjan Parlamentteriniń tóraǵalary Túrki akademııasynyń altyn medalimen marapattaldy
Atap aıtqanda, Túrkııa Uly Ulttyq Májilisiniń spıkeri Mustafa Shentop, Ázerbaıjan Ulttyq Májilisiniń tóraǵasy Oktaı Asadov, Túrkııanyń Qazaqstandaǵy Tótenshe jáne Ókiletti elshisi Nevzat Ýıanyk, Ázerbaıjanyń Qazaqstandaǵy Tótenshe jáne Ókiletti elshisi Rashad Mammadov, belgili ǵalym, Ázerbaıjan Ulttyq Májilisiniń depýtaty Javanshır Faızıev bastaǵan delegatsııa ókilderi Halyqaralyq Túrki akademııasynyń prezıdenti Darhan Qydyrálimen kezdesip, atqarylyp jatqan jumystarmen tanysty. Sondaı-aq, kezdesýge TúrikPA-nyń Bas hatshysy Altynbek Mamaıýsýpov, Túrki keńesi Aqsaqaldar keńesiniń múshesi Ádil Ahmetov, Qazaqstan – Túrkııa parlamentaralyq dostyq tobynyń jetekshisi, depýtat Mehmat Álı Jevherı, eki el parlamentteriniń birqatar depýtattary qatysty.
«Búgin elordada ótetin Eýrazııa Májilis tóraǵalary spıkerleriniń jıynyna kelgen Túrkııa men Ázerbaıjan respýblıkalary Parlamentteriniń tóraǵalary Halyqaralyq Túrki akademııasyna arnaıy kelip otyr. Bıyl 10 jyldyǵy atalyp ótip jatqan Nahchvan kelisimi men Nahchvan sammıti týraly dóńgelek ústel ótti. Túrkııa Uly Ulttyq Májilisiniń tóraǵasy Mustafa Shentop bastaǵan túrkııalyq depýtatttar, Ázerbaıjan Ulttyq Májilisiniń tóraǵasy Oktaı Asadov bastaǵan mártebeli meımandarmen kezdesýde jalpy túrki yntymaqtastyǵyndaǵy Elbasy Nursultan Nazarbaevtyń orny erekshe atalyp ótti. Sondaı-aq, yntymaqtastyqtyń 10 jyldyǵynyń damý barysy, Túrki akademııasynyń atqaryp jatqan jumystary jaıly sózder aıtyldy. Ortaq tarıh, ortaq ádebıet baǵytyndaǵy akademııanyń jumysyna oń baǵa berildi. 10 jyl buryn Nahchvanda bastalǵan ıntegratsııalyq jumystardyń barlyǵy, onyń bastaýynda Elbasynyń turǵany atalyp ótti», - dedi Darhan Qydyráli.
Akademııa basshysy meımandardy Túrki mýzeıimen tanystyryp, birneshe jyldan beri qarqyndy túrde júrgizilip kele jatqan arheologııalyq qazba jumystarynyń nátıjesin baıandap berdi. Delegatsııa basshylary mýzeıdegi «Qonaqtar kitabyna» izgi tilekterin jazyp, qoltańbalaryn qaldyrdy.
Osydan keıin Halyqaralyq Túrki akademııasynyń kitaphanasynda jalǵasqan alqaly jıyn barysynda qatysýshylar túrki elderiniń parlamentaralyq yntymaqtastyǵy men tarıhı tamyrlastyq, ǵylym jáne bilim salasyndaǵy baılanystar jóninde óz oılaryn ortaǵa saldy. Kezdesý sońynda Darhan Qydyráli mártebeli meımandarǵa Túrki akademııasy shyǵarǵan baǵaly basylymdardy syılady. Qurmet retinde akademııa basshysy mártebeli meımandardy Halyqaralyq Túrki akademııasynyń Altyn medalimen marapattap, shapan japty.
