Túrkııa men AQSh shaǵyn modýldik reaktorlar boıynsha kelisimge qol qoıdy
ASTANA. KAZINFORM — Túrkııa men AQSh shaǵyn modýldik jáne tórtinshi býyn reaktorlaryn damytý múmkindikterin zertteýge arnalǵan grant bólý týraly kelisimge keldi, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Energetıka jáne tabıǵı resýrstar mınıstrliginiń málimetinshe, Nıý-Iorkte eldiń memlekettik energetıkalyq kompanııasy TUNAS pen AQSh-tyń Saýda jáne damý agenttigi (USTDA) tıisti qujatqa qol qoıdy.
Túrkııanyń Energetıka jáne tabıǵı resýrstar mınıstri Alparslan Baıraktardyń aıtýynsha, joba aıasynda zamanaýı ıadrolyq tehnologııalardy qoldanýdyń tehnıkalyq, ekonomıkalyq jáne quqyqtyq múmkindikteri jan-jaqty zertteledi. Onyń ishinde shaǵyn modýldik reaktorlar (SMR) men tórtinshi býyn reaktorlarynyń áleýeti baǵalanady.
Mınıstrdiń sózinshe, bul jumystar Túrkııanyń energetıkalyq teńgerimdi ártaraptandyrý jáne energetıkalyq táýelsizdigin kúsheıtý maqsatymen úndes. El 2053 jylǵa qaraı kómirqyshqyl gazy shyǵaryndylaryn barynsha azaıtýdy kózdep otyr.
— Elimizdiń maqsaty — energetıkalyq teńgerimdi ártaraptandyryp, iri atom elektr stantsııalarymen qatar, zamanaýı ári ornyqty energetıkalyq ınfraqurylymdy qalyptastyrýdy jalǵastyrý, — dedi Túrkııa mınıstri.
Kelisim aıasynda Túrkııa ártúrli tehnologııalyq sheshimderdi zerttep, eldiń energetıkalyq qajettilikterine barynsha saı keletin nusqalardy aıqyndaıdy.
Buǵan deıin Túrkııanyń ońtústiginde eldegi alǵashqy «Akkýıý» atom elektr stantsııasynyń qurylysy aıaqtalýǵa jaqyn ekenin habarlaǵan edik.
