Túrkııa mektepterinde túrki álemine arnalǵan jańa kýrs engizildi
ASTANA. KAZINFORM — Túrkııanyń Ulttyq bilim mınıstrligi túrki áleminiń tarıhy men mádenıetine arnalǵan jańa oqý materıaldaryn ázirledi. Bul týraly Kazinform agenttiginiń Ankaradaǵy menshikti tilshisi habarlady.
Jańa oqý jylynan bastap Túrkııa mektepteriniń oqý baǵdarlamasyna tańdaý páni retinde «Túrki álemi» kýrsy engizildi. Ony oqytý úshin eldiń Ulttyq bilim mınıstrligi «Túrki áleminiń mádenı atlasy» jáne «Túrki álemine saıahat» atty eki negizgi oqý quralyn ázirledi.
Túrkııanyń bıleýshi Ádilet jáne damý partııasy (ÁDP) tóraǵasynyń orynbasary, túrki memleketterimen baılanystar jónindegi bólim basshysy Kúrshad Zorlý jańa oqý quraldarynyń maqsaty — jas urpaqtyń ortaq mádenı mura týraly bilimin arttyryp, qazirgi túrki álemin tereńirek túsinýine jáne ózara baılanystyń mańyzyn uǵynýyna múmkindik berý ekenin atap ótti.
— Bıyl Túrkııanyń Ulttyq bilim mınıstrliginiń bastamasymen túrki álemi úshin asa mańyzdy joba júzege asyp jatqanyna qýanyshtymyz. Bastaýysh jáne orta mektep oqýshylaryna arnalǵan túrki álemi týraly oqý materıaldary ázirlendi. Bul eńbekterde túrki áleminiń tarıhı tulǵalary, ejelgi qalalary, tabıǵı, mádenı, ádebı jáne óner murasy bir arnaǵa toǵystyrylǵan. Ortaq qundylyqtar men dástúrler oqýshylardyń jas ereksheligi men bilim deńgeıine saı, túsinikti tilmen berilgen, — dedi saıasatker.
Jańa oqý materıaldary oqýshylardy túrkitildes halyqtardyń tarıhy, mádenıeti, geografııasy jáne ortaq murasymen tanystyrýǵa baǵyttalǵan. Kýrs mektep oqýshylarynyń túrki álemindegi elder men qoǵamdar týraly bilimin keńeıtip, olardyń arasyndaǵy mádenı baılanystardy nyǵaıtýǵa yqpal etedi dep kútiledi.
Buǵan deıin Astanada ótken «Túrki áleminiń dıalogy: ortaq bolashaq, ortaq kózqaras» atty paneldik pikirtalasta túrki álemin damytýdyń perspektıvalary talqylanǵany habarlanǵan bolatyn.
