Túrkııa mektepterdegi qaýipsizdik sharalaryn kúsheıtpek
ASTANA. KAZINFORM — Kahramanmarash jáne Shanlyýrfa provıntsııalaryndaǵy qarýdyń qatysy bar oqıǵadan keıin Túrkııa bıligi mektepterdegi qaýipsizdikti kúsheıtý boıynsha keshendi jospardy jedel túrde engizbek, dep habarlaıdy Kazinform agenttiginiń Ankaradaǵy tilshisi.
Túrkııanyń Ulttyq bilim mınıstrliginiń málimetinshe, jańa jospar kópdeńgeıli sıpatqa ıe. Ol tek fızıkalyq qaýipsizdikti ǵana emes, sonymen qatar oqýshylardyń psıhologııalyq ál-aýqatyn qamtamasyz etýge baǵyttalǵan.
Jospar aıasynda mektepter, quqyq qorǵaý organdary jáne memlekettik qurylymdar arasyndaǵy úılestirý kúsheıtiledi. Sonymen qatar qaýip-qaterlerdi erte anyqtaý jáne jedel áreket etý tetikteri engiziledi.
Túrkııa prezıdenti Rejep Taıyp Erdoǵan mektep qaýipsizdigi memleket úshin basty basymdyqtardyń biri ekenin jáne bul máselede ymyraǵa jol berilmeıtinin atap ótken bolatyn.
Qarastyrylǵan sharalardyń qatarynda mektepke kirý-shyǵýdy qatań baqylaý bar. Endi ata-analar tek arnaıy belgilengen aımaqtarda ǵana bola alady, al ǵımaratqa kirý shekteledi. Sonymen birge ata-analar úshin aldyn ala tirkelý júıesi engizilip, kelýshilerdi tekserý kúsheıtiledi.
Sondaı-aq beınebaqylaý kameralaryn mindetti túrde ornatý jáne týrnıketter engizý josparlanýda. Tsıfrlyq qaýipsizdikke de erekshe kóńil bólinedi: ata-analar úshin ınternetke táýeldilik pen onlaın qaýipter boıynsha keńes berý jelileri iske qosylady.
Muǵalimder men mektep ákimshiligi úshin daǵdarys jaǵdaıynda áreket etý jáne kúızelis jaǵdaıyndaǵy oqýshylarmen jumys isteý boıynsha arnaıy trenıngter ótkiziledi. Sonymen qatar qaýipterdi erte anyqtaý júıeleri men psıhologııalyq qoldaý sharalary kúsheıtiledi.
Al zardap shekken óńirlerde daǵdarys toptarynyń jumysy jalǵasýda. Oqýshylarǵa, ata-analar men pedagogtarǵa psıhologııalyq kómek kórsetilip, mektepterge qosymsha mamandar jiberilgen.
Buǵan deıin Túrkııada oqý oryndaryna jasalǵan qarýly shabýyldardan keıin áleýmettik jelilerde qorqytý sıpatyndaǵy habarlamalar taratqan tulǵalarǵa qatysty tergeý bastalǵany habarlanǵan edi.
