Túrkııa medıtsınalyq kannabısti maquldady: ony qandaı aýrýlarǵa taǵaıyndaıdy

Túrkııa resmı túrde medıtsınalyq kannabısti qoldanýdy zańdastyrdy, dep habarlaıdy Kazinform agenttiginiń menshikti tilshisi.

Tıisti zań Parlament tarapynan qabyldandy jáne qoǵamda keńinen rezonans týdyrdy. Synǵa jaýap retinde Túrkııanyń densaýlyq saqtaý mınıstri Kemal Memıshoǵlý kannabıs negizindegi preparattardy taǵaıyndaýdyń jańa tártibi týraly túsinikteme berdi.

Mınıstrdiń aıtýynsha, mundaı quraldar qatań baqylaýda bolady: olar tek retsept boıynsha, dárilik formada, dárigerdiń baqylaýymen jáne eldiń Densaýlyq saqtaý mınıstrliginiń mindetti ruqsatymen ǵana beriledi. Memıshoǵlý sondaı-aq durys medıtsınalyq qoldaný kezinde táýeldilik qaýpi bolmaıtynyn atap ótti.

Belgili bolǵandaı, kannabıs negizindegi preparattar 15-ten astam aýrýdy emdeý kezinde taǵaıyndalatyn bolady. Kórsetilimder tizimine mynalar kirdi:

• nevrologııalyq buzylystar

• akne

• sozylmaly aýyrsynýlar

• shızofrenııa

• mazasyzdyq buzylystary

• hımıoterapııadan týyndaǵan júrek aınýyn qosa alǵanda, júrek aıný

• dıskınezııa

• psorıaz

• revmatoıdty artrıt

• keıbir júrek-qantamyr aýrýlarynyń túrleri

Budan bólek, mamandar ǵylymı derekter men klınıkalyq baqylaýlar jınaqtalǵan saıyn kórsetilimder tizimin keńeıtý múmkindigin qarastyryp jatyr.

Osylaısha, Túrkııa medıtsınalyq kannabıs sozylmaly jáne emdeýge qıyn aýrýlardy keshendi emdeý júıesiniń bir bóligine aınalyp jatqan elderdiń qataryna qosyldy, bul rette qaýipsizdik pen memlekettik baqylaýǵa basa nazar aýdarylyp otyr.

Buǵan deıin biz Túrkııalyq kásipker Mýrad Úlkerdiń elde medıtsınalyq kannabısti zańdastyrýǵa qarsy shyqqanyn habarlaǵan edik.

Germanııada kannabıs týraly zań kúshine endi.