Túrkııa Mańǵystaýdaǵy qaıǵyly oqıǵaǵa baılanysty Qazaqstanǵa kóńil aıtty
ASTANA. KAZINFORM — Túrkııa Kaspıı teńizindegi áskerı oqý-jattyǵý kezinde áskerı qyzmetshilerdiń qaza tabýyna baılanysty Qazaqstanǵa kóńil aıtty, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń bıliktegi Ádilet jáne damý partııasy tóraǵasynyń orynbasary, Túrki memleketterimen baılanys jónindegi jaýapty Kúrshat Zorlý Qazaqstannyń basyna túsken qaıǵy baýyrlas Túrkııa halqynyń da ortaq qaıǵysy ekenin aıtty.
Qazaqstanda jarııalanǵan Jalpyulttyq aza tutý kúnine baılanysty ol qaza tapqandardyń otbasylary men áriptesterine, sondaı-aq barsha qazaq halqyna kóńil aıtty.
— Qaza bolǵandardyń rýhyna tynyshtyq, artynda qalǵan týǵan-týystary men jaqyndaryna sabyr tileımin. Qaıǵylaryńyzǵa ortaqpyn, — delingen úndeýde.
Sondaı-aq qıyn-qystaý kúnderi Túrkııa men Qazaqstan bir-birine qoldaý kórsetip, ózara yntymaqtastyǵyn odan ári nyǵaıta beretini atap ótildi.
Mańǵystaýdaǵy qaıǵyly oqıǵaǵa baılanysty shet memleketterdiń basshylary men halyqaralyq uıym jetekshilerinen Prezıdent Qasym-Jomart Toqaevqa kóńil aıtý jedelhattary áli de kelip jatyr.
