Túrkııa Lıvııa armııasy Bas shtabynyń basshysy mingen ushaq apatyna qatysty tergeýdi bastady

ASTANA. KAZINFORM — Ankarada ushaq apatyna qatysty Bas prokýrordyń birinshi orynbasary bastaǵan tórt prokýrordan turatyn tergeý toby quryldy, dep habarlaıdy Anadoly.

Haımana aýdany Kesıkkavak aýyly mańyndaǵy taýly aımaqta qulaǵan ushaq týraly aqparat túsken soń oqıǵa ornyna jandarmerııa bólimsheleri, órtke qarsy qyzmet bólimsheleri men medıtsınalyq toptar jóneltildi.

Aýa-raıynyń qolaısyzdyǵy men joldy laı basyp qalǵandyqtan qutqarýshylar oqıǵa ornyna jaıaý jetti. Qazir tótenshe jaǵdaılar qyzmeti apat ornynda jumys istep jatyr.

Túrkııanyń Ádilet mınıstri Iylmaz Týnch Lıvııa Bas shtabynyń basshysy general-polkovnık Muhammed Álı ál-Haddad mingen ushaqtyń apatqa ushyraýyna baılanysty resmı tergeý bastalǵanyn rastady.

Onyń aıtýynsha, tergeý jan-jaqty jáne barlyq mán-jaıdy muqııat eskere otyryp júrgizilip jatyr. Bul týraly ol NSosyal áleýmettik jelisinde habarlady.

Esterińizge sala keteıik, seısenbi kúni keshke Ankaradaǵy Esenboga áýejaıynan Trıpolıge bet alǵan Falcon ushaǵy kóterilgennen keıin kóp uzamaı apatqa ushyraǵan bolatyn. Muhammed Álı ál-Haddadtyń qaıtys bolǵanyn Trıpolıdegi Lıvııa úkimetiniń basshysy rastady.

Túrik aqparat quraldarynyń habarlaýynsha, ushaq Ankaradan ońtústikke qaraı shamamen 70 shaqyrym jerde, Haımana qalasyna jaqyn aýmaqta radardan joǵalyp ketken. Túrkııanyń ishki ister mınıstri Alı Erlıkaıa Falcon 50-men baılanys jergilikti ýaqyt boıynsha saǵat 20:52–de úzilgenin málimdedi.

Bortta ál-Haddad pen taǵy tórt jolaýshy bolǵan.

Aıta keteıik, buǵan deıin Grýzııada túrik áskerı ushaǵy apatqa ushyrady.